Swansea niyo yafunguye amazamu ibifashijwemo na Wayne Routledge watsinzwe igitego ku munota wa 12.

Javier Hernandez ‘Chicharito’ yishyuye icyo gitego ku munota wa 16, ariko nyuma yabwo Manchester United ikora amakosa menshi mu kibuga yaje no kuyiviramo ikarita y’umutuku yahawe Fabio Da Silva ku munota wa 80.

Kwirukanwa mu kibuga kwa Fabio kwasize icyuho ku ruhande rwa Manchester United maze irushwa na Swansea, ndetse biza gutuma iyo kipe ibona igitego cya kabiri ku munota wa 90 cyatsinzwe na Wilfried Bony.

Mu ikipe ya Manchester United ibintu birimo gukomeza kuba bibi, kuko mu myaka 27 Sir Alex Ferguson yamaze atoza Manchester United, iyo kipe yasezererewe rimwe gusa mu cyiciro cya gatatu (round 3) cya FA.

Ikipe ya Swansea, ni ubwa mbere yabashije gutsindira Manchester United iwayo Old Trafford mu myaka 82 ishize. Manchester United kandi imaze gutsindirwa mu rugo inshuro eshanu muri uyu mwaka w’imikino, ibintu bidasanzwe kuri iyo kipe yatwaye igikombe cya shampiyona giheruka.

Ubwo Mancheser United yasezererwaga, andi makipe y’ibigugu yo yakomeje mu cyiciro cya kane, aho Arsenal yasezereye Tottenham iyitsinze ibitego 2-0, Chelsea isezerera Derby County iyitsinze 2-0, Liverpool isezerera OLdhman Athletic iyitsinze nayo ibitego 2-0, mu gihe Manchester City yo izakina umukino wa kamarampaka na Blackburn Rovers kuko ayo makipe yanganyije igitego 1-1.

Imikino ya FA izakomeza mu cyiciro cya kane (1/32) tariki 24/1/2014 aho Arsenal yatomboye kuzakina na Coventry, Chelsea ikine na Stoke, Liverpool ikine n’izakomeza hagati ya Bournemouth na Burton, izakomeza hagati ya Blackburn na Manchester City izakine n’izakomeza hagati ya Bristol City na Watford.

Theoneste Nisingizwe