Manchester City yari yaratsindiwe iwayo ibitego 2-0 na Barcelone yaje kongera gutsindwa ibitego 2-1i Camp Nou muri Espagne kuri Stade ya FC Barcelone, ku mugoroba wa tariki 12/03/2014.

Niko byagendekeye kandi ikipe ya Bayen Leverkusen yo mu Budage, yari yaratsinzwe ibitego 4-0 n’ikipe ya Paris Saint Germain yo mu Bufaransa, ikongera gutsindirwa kandi i Paris ibitego 2-1 mu mukino wo kwishyura.

Izi kipe zasezerewe muri 1/8 cy’irangiza muri Champions League ziyongereye ku zari zasezerewe kuwa 11 Werurwe 2014 arizo Arsenal yo mu Bwongereza yasezerewe inganije na Bayern Munich yo mu Budage 1-1, ariko mu mukino ubanza wabereye mu Bwongereza Bayern Munich ikaba yari yahatsindiye Arsenal 2-1.

AC Milan yo mu Butaliyani yaje kunyagirwa na Atletico Madrid yo muri Espagne ibitego 4-1 ku mukino wo kwishyura wabereye muri Espagne, mu gihe mu mukino ubanza Atletico Madrid yari yatsindiye AC Milan imbere y’abafana bayo i San Siro igitego 1-0.

Kuri ubu FC Barcelone, FC Bayern Munich, Atletico Madrid na Paris Saint Germain zikaba zamaze kwinjira muri ¼ cy’irangiza muri aya marushanwa y’amakipe yabaye aya mbere iwayo ku mugabane w’i Burayi (UEFA Champion’s League).

Benshi baribaza biba iri rushanwa rizaryohera benshi kuko bafite impungenge ko amakipe yo mu gihugu cy’ubwongereza hafi ya yose uretse Chelsea bamwe baha amahirwe, ashobora kuvamo kandi afite abafana batari bake mu Rwanda no ku isi.

Safari Viateur