Ibrahimovic w’imyaka 30, yaguzwe muri Milan AC miliyoni 31 z’ama Pounds, akaba yeretswe imbaga nini y’abafana ba PSG ku mugaragaro kuri uyu wa gatatu tariki 18/7/2012, mu mujyi i Paris hafi y’umunara ‘Tour Eifel’.

Ibrahimovic watsinze ibitego byinshi kurusha abandi (28) muri shampiyona y’Ubutaliyani mu mwaka w’imikino ushize, yasinye amasezerano y’imyaka itatu muri PSG aho azajya ahembwa miliyoni 14 z’ama Euro buri mwaka.

Bivuze ko abaye umukinnyi wa kabiri uhembwa neza mu mupira w’amaguru ku isi nyuma ya Samuel Eto’o Fils uhembwa miliyoni 20 z’Ama Euro ku mwaka mu ikipe Anzhi Machkakhala yo mu Burusiya.

Abandi bakinnyi bakurikiraho ni Wayne Rooney uhembwa miliyoni 13,8 muri Manchester United, Yaya Touré uhembwa miliyoni 13,8 muri Machester City, Cristiano Ronaldo uhembwa miliyoni 13 muri Real Madrid.

Ku mwanya wa gatandatu hari Sergio Aguerro uhembwa miliyoni 12,5 muri Manchester City, Nicolas Anekla ufata miliyoni 12,5 muri Shangahai China, Seydou Keita ufata miliyoni 12 muri Dalian Aerbin , Didier Drogba uhembwa miliyoni 11,5 muri Shanghai China , Lionel Messi ahembwa miliyoni 11 muri FC Barcelone, na Fernando Torres uhembwa miliyoni 10,8 muri Chelsea.

Aya mafaranga yinjizwa n’aba bakinnyi ku mwaka ntabwo habariwemo akayabo bahabwa ku bijyanye no kwamamaza ndetse no kugurisha imyenda ; nk’uko byatangajwe na Eurosport.fr dukesha iyi nkuru.

Uretse kuba ari uwa kabiri mu bakinnyi bahembwa neza ku isi muri ruhago, Zlatan Ibrahmovic amaze no kuba umukinnyi wa mbere ku isi uguzwe amafaranga menshi mu buzima bwe.

Kuva yatangira gukina umupira w’amaguru nk’uwabigize umwuga, amaze kugurwa miliyoni 150 z’ama pounds yatanzweho n’amakipe yamuguze ariyo Ajax Amsterdam, Juventus, Inter de Milan, FC Barcelone, Milan AC na Paris Saint Germain.

Theoneste Nisingizwe