Umuyobozi w’akarere ka Karongi, Kayumba Bernard yabitangaje kuwa gatandatu (10/03/2012) nyuma y’umukino wa gicuti w’umupira w’amaguru wahuje ikipe yitwa Ruburikinya yo mu murenge wa Rubengera Kayumba abereye perezida, na Kivu Watt FC ikuriwe na Ndagije Aimable, umuyobozi wa EWSA ishami rya Karongi.

Nyuma y’uwo mukino wabereye ku kibuga cy’umupira w’amaguru cya ETO Kibuye ukarangira amakipe yombi anganya (2-2), abakinnyi na bamwe mu bafana bakoze ubusabane, abayobozi bayo bahuriza ku ijambo rimwe bavuga ko nubwo bakinnye ari amakipe abili, intego yari imwe.

Guhura nk’Abanyakarongi, bakidagadura kandi bakanahuza intumbero; ibyo Abanyakarongi bakunze kuvuga mu cyongereza bati: One Vision, One Mission, One Team.

“Iyo abantu bafata umwanya bagakora siporo bakanidagadura bituma bamenyana, bagasabana, bagatera umugongo amatiku ahubwo ugasanga n’umuntu abasha kuboneraho umwanya wo kuganira na mugenzi we ku kibazo runaka yari yaraburiye umuti”; nk’uko umuyobozi w’akarere ka Karongi yakomeje abisobanura.

Perezida wa Kivu Watt FC akaba n’umuyobozi wa EWSA ishami rya Karongi, Ndagije Aimable, nawe yunze mu ry’umuyobozi w’akarere agira ati “Birababaje kubona Abanyakigali bamanuka bakaza Karongi muri weekend kuruhuka no kwidagadura ku Kivu, ariko twe Abanyakarongi ugasanga nta muntu n’umwe usigaye hano twigiriye i Kigali muri weekend! Kuki tutajya dutegura imikino n’indi myidagaduro itandukanye hano ku Kibuye hanyuma abava Kigali bakaza bataje ku Kivu gusa ahubwo bakaza no kureba ruhago yacu?.”

Mu muhango wo kwakira no gushima amakipe yombi uburyo yagaragaje umukino mwiza kandi wo mu rwego rwo hejuru, banaganiriye ku ngamba zo kozongera kubyutsa ikipe y’umupira w’amaguru ya Karongi, nyuma y’uko iyahozeho isenyutse mu mwaka wa 2010.

Umuyobozi w’akarere ka Karongi avuga ko bizasaba uruhare rw’abaterankunga kugira ngo akarere kabe kakubakirwa indi stade isimbura stade Gatwaro yari ishaje cyane ikaza gusenywa kugira ngo hagurirwe ibitaro bya Kibuye.

Nk’umuyobozi Karongi akaba na Perezida wa Ruburikinya, ikipe y’umurenge wa Rubengera, Kayumba yiyemeje gushyiraho ibikombe bibili bizahatanirwa n’amakipe yombi (Ruburikinya & Kivu Watt FC) kugira ngo akarere karusheho guteza imbere umukino wa ruhago.

Igikombe cya mbere kizajya gihatanirwa ku munsi w’umurimo tariki ya 1/05 buri mwaka, icya kabili gikinirwe ku munsi wo kwibohora kuya 04/07 buri mwaka. Mayor Kayumba yanateye inkunga y’imyenda ikipe ya Kivu Watt FC mu rwego rwo kuyishyigikira dore ko imaze ukwezi kumwe gusa ivutse.

Ushinzwe ingabo mu karere ka Karongi, Colonel Ruzibiza Eugene, nawe urangwa no gukunda siporo, cyane cyane umupira w’amaguru akaba n’umukunzi wa Ruburikinya by’umwihariko, yatanze impano y’imipira yo gukina ibiri kuri buri kipe, anagenera ishuli rya ETO Kibuye imipira 2 ya basketball kubera inkunga ryabateye ribatiza ikibuga cyo gukiniraho no gukoreraho imyitozo.

Colonel Ruzibiza ati: “mujye mukunda football kandi mwibuke ko ikinwa n’umuntu ufite umwuka kuko n’umupira muba mukina uba urimo umwuka. Mudafite umwuka rero umupira wajya widunda ukabasiga, n’umupira utarimo umwuka, mwajya muwutera ntuve aho uri. Mugomba kwidunda n’umupira ikidunda”.

Muri ibi bihe, akarere ka Karongi kahagurukiye guteza imbere siporo n’imyidagaduro kuko ari imwe mu nzira zihuriza abantu hamwe bakagira ibitekerezo byubaka, kandi n’umubiri wabo ukaboneraho kugubwa neza, aka rya zina ry’ikipe y’umurenge wa Rubengera Ruburikinya.

GASANA Marcellin