Igitego cya Neymar da Silva Santos Junior ‘Neymar’ yatsinze ku munota wa 19 w’igice cya mbere n’icya Alexis Sanchez ku munota wa 78, nibyo byahesheje amanota atatu Barcelone, mu gihe igitego cy’impozamarira cya Real Madrid cyatsinzwe na Jose Rodriguez ku munota wa 90.

Mbere y’uko uwo mukino uba, byari byitezwe ko amakipe yombi aza gushingira ku bihanganye byayo birimo Lionel Messi na Neymar ku ruhande rwa FC Barcelone na Cristiano Ronaldo na Gareth Bale ku ruhande rwa Real Madrid.

Muri ibyi bihanganye byose, Neymar niwe wigaragaje kurusha abandi kuko, uretse kuba yakinnye neza uwo mukino akagora ba myugariro ba Real Madrid, yanatsinze igitego cya mbere ku munota wa 19 nyuma yo gucenga ba myugariro.

Mu gice cya mbere Lionel Messi, Barcelone isanzwe igenderaho, yagerageje gukina neza ashakisha ibitego, ariko igice cya kabiri ntabwo yagaragaye cyane. Cristiano Ronaldo, wari witezwe gutsindira Madrid, ntabwo yabashije kubona igitego, ndetse n’aho yashyizwe hasi mu rubuga rw’amahona, umusifuzi yabyirengagije.

Gareth Bale wari ukiniye Real Madrid umukino wa mbere ukomeye kuva yajya muri iyo kipe aguzwe akayabo ka miliyoni 86 z’ama pounds, ntabwo yabashije kwigaragaza. Ku munota wa 60 yasimbuwe na Karim Benzema wagerageje gushaka igitego ariko biranga.

FC Barcelone yashimangiye intsinzi ku munota wa 78, ubwo Alexis Sanchez wari usimbuye Cesc Fabregas yatsindaga igitego cyiza anyujije umupira hejuru y’umunyezamu Diego Lopez wari wasohotse.

Real Madrid nayo yasimbuje abakinnyi ikongeramo abasatira, yaje kwishyuramo igitego kimwe ku munota wa 90, cyatsinzwe na Jose Rodriguez wari winjiye mu kibuga asimbura Angel Di Maria, umukino urangira ari ibitego bibiri bya FC Barcelone kuri kimwe cya Real Madrid.

Nyuma yo gutsinda mukeba wayo, FC Barcelone ikomeje kwicara ku mwanya wa mbere n’amanota 28, ukirikiwe na Athletico Madrid ifite amanota 24, naho Real Madrid ikaza ku mwanya wa n’amanota 22.

Dore abakinnyi babanje mu kibuga n’abasimbiye ku mpande zombi:

FC Barcelone: Valdés, Alves, Piqué, Mascherano, Adriano, Sergio Busquets, Xavi, Iniesta (Song 77), Fàbregas (Alexis 70), Messi, Neymar (Pedro 84).

Real Madrid: Diego López, Carvajal, Varane, Pepe, Marcelo, Ramos (Illarramendi 56), Modric, Khedira, Di Maria (Jese 76), Ronaldo, Bale (Benzema 61).

Theoneste Nisingizwe