Muri uwo mukino wa 1/16, Arsenal yatsinze Borussia Dortmund ku kibuga cyayo mu Budage 1- 0, ibintu byari bimaze igihe bitabaho ku ikipe ya Dortmund.

Amakipe yo mu Budage akunze gutsindira Arsenal iwayo, ariko Arsenal yajya mu Budage nayo igatahana insinzi.

Muri Champions League ishize, Arsenal yatsinzwe n’ikipe ya Bayern Munich ibitego 3 ku kibuga cyayo, yajya mu Budage ikatsindirayo Bayern 2-0. Ibi kandi byayibayeho itsindwa na Schalke 04 mu Bwongereza ariko biza kunganyiriza mu Budage.

Ikipe ya Arsenal ibifashijwemo na Ramsey yatunguye abantu cyane. Borussia Dortmund yari imaze igihe idatsindwa ndetse yanatsindiye Arsenal i Londres ibitego 2-1. Arsenal yaciye agahigo ko kudatsindirwa n’ikipe iyariyo yose yo mu Budage mu myaka 2 ishize.

Abakunze gukora isesengura mu mupira w’amaguru bemeza neza ko bakurikije imikinire ya Arsenal bamaze iminsi babona, ikipe ya Manchester United itazayiva mu nzara kuri uyu wa 9/11/2013 mu mukino wa shampiyona ya Premier League dore ko ikipe ya Manchester isigaye igaragaza intege nke cyane mu mikino ikina.

Mu yindi mikino ya Champions League yabaye kuri uyu mugoroba, ikipe ya Chelsea yatsinze bidasubirwaho ikipe ya Schalke 04, ibitego 3-0. Ikipe ya Barcelone itsinda AC Milan 3-1. Ajax Amsterdam itsinda Celtic 1-0. Marseille itsindwa na Napoli 3-2.

Ikipe ya Basel inganya na Steaua 1-1 mu gihe ikipe ya Atletico Madrid yanyagiye Vienna 4-0, Zenit inganya na FC Porto 1-1.

Safari Viateur