Kuri Stade Amahoro kuri uyu wa mbere,abakinnyi bagera kuri 18 bayobowe n’umutoza Johnny McKinstry bakoze imyitozo ya nyuma mbere y’uko bahaguruka na Rwandair i Saa kumi n’ebyiri z’umugoroba kuri uyu wa mbere.

Iyi kipe y’igihugu Amavubi,ikaba yakoraga imyitozo yo gutegura umukino uzahuza Afurika y’Epfo n’u Rwanda uzabera kuri Sitade ya Kaminuza ya Johannersburg saa 15:00 kuwa Kabiri tariki 28/07/2015.

Mu kiganiro twagiranye n’umutoza w’ikipe y’igihugu Amavubi,yavuze ko uyu mukukino uri mu rwego rwo gukomeza kwitegura imikino ya CHAN ndetse n’umukino wa Ghana,aho ndetse kandi uyu mukino uzaba ufasha abakinnyi bashya kumenyera.

McKinstry ati "Uyu ni umukino wo gusuzuma bamwe mu bakinnyi,twatsindwa,twanganya,twatsinda,nta kidasanzwe bizaba bivuze ,icya ngombwa ni ukureba uko abakinnyi bahagaze,gusuzuma niba abakinnyi bamaze kwiyumva mu buryo bw’imitoreze"

Abakinnyi 18 berekeje muri Afrika y’epfo

Mu izamu : Olivier Kwizera na Eric Ndayishimiye

Abakina inyuma: Celestin Ndayishimiye, Fitina Omborenga, Jean Marie Rukundo, Faustin Usengimana, Amani Uwiringiyimana na Fabrice Twagizimana

Abakina hagati : Amran Nshimiyimana,Tumaini Ntamuhanga, Innocent Habyarimana, Amini Muzerwa, Kevin Muhire, Savio Dominique Nshuti na Jacques Tuyisenge.

Abakina imbere : Danny Usengimana, Isaie Songa na Ernest Sugira

Nyuma y’umukino w’Afurika y’epfo, Amavubi azerekeza muri Ecosse ku itariki 2 Kanama, mu mwiherero uzamara ibyumweru bibiri aho Amavubi azakina imikino ya gicuti igera kuri itatu n’amakipe yo mu cyiciro cya mbere muri icyo gihugu,

Sammy IMANISHIMWE