Nyuma yo gutsinda Libya, ikipe y’u Rwanda yategereje umunsi umwe kugirango imenye ikipe zizahura hagati ya Namibia na Congo Brazzaville kuko zo zakinnye umukino wazo wo kwishyura kuri iki cyumweru.

Nyuma yo gutsinda igitego 1-0 muri Namibia, ikipe ya Congo Brazzaville yitwaye neza mu rugo i Pointe Noire, maze ihatsindira ibitego 3-0 byatsinzwe na Ganvoula, Fodé Doré, na Ladislas Douniama, maze bituma ikomeza ku giteranyo cy’ibitego 3-1.

Na mbere y’uko bamenya ikipe bazahura mu cyiciro cya kabiri cy’ayo majonjora, kapiteni w’ikipe y’u Rwanda Haruna Niyonzima bamaze gutsinda Libya yadutangarije ko ikipe yose bazahura nayo bagomba kuzayitsinda kuko ngo benshi batizeraga ko basezerera Libya.

Yagize ati “Ikipe yose yaba Congo cyangwa Namibia tuzayitegura neza kandi twigirire icyizere, nk’uko twabikoze uyu munsi dusezerera ikipe ikomeye nka Libya n’izindi tuzazitsinda.

Mu mupira w’amaguru byose birashoboka, ni abakinnyi 11 kuri 11, icya mbere ni ukwitegura neza, buri wese urebwa n’umupira yaba ‘federation’, abakinnyi, abatoza ndetse n’abafana bagatanga umusanzu wabo”.

Umukino ubanza uzabera muri Congo tariki 18/7/2014 naho uwo kwishyura ukazabera i Kigali nyuma y’ibyumweru bibiri umukino ubanza ubaye. Ikipe izatsinda muri iyo mikino ibiri, izahita ijya mu itsinda rya mbere ririmo Nigeria, Afurika y’Epfo na Sudan.

Mu makipe y’ibigugu byo mu karere, Uganda yakomeje mu cyiciro gikurikiyeho nyuma yo gusezerera Madagasacar ku giteranyo cy’ibitego 2-2 ariko Uganda yari yarabashije kwinjiza igitego hanze bituma ikomeza.

Kenya yasezereye ibirwa bya Comores ku giteranyo cy’ibitego 2-1, Tanzania ikomeza nyuma yo gutsinda Zimbabwe ku giteranyo cy’ibitego 3-2, naho u Burundi busezererwa na Botswana nyuma yo gutsindwa igitego 1-0.

Theoneste Nisingizwe