Ikipe y’igihugu y’u Rwanda mu mupira w’amaguru Amavubi yageze ku mukino wa nyuma wa CECAFA nyuma yo gutsinda kuri penaliti ikipe ya Sudan, mu mukino wa kimwe cya kabiri w’iri rushanwa riri kubera muri Ethiopia, wazihuje kuri uyu wa kane tariki 3 Ukuboza 2015.

Umukino warangiye amakipe yombi anganya ibitego 1-1, nyuma y’uko Amavubi yishyuye igitego yari yatsinzwe, bigatuma bagera muri penaliti aho Amavubi yatsinze Sudani penaliti 4-2.

Abakinnyi b’Amavubi bitwaye neza begukana tike y’umukino wa nyuma muri CECAFA nyuma yo gutsinda Sudani ku mapenaliti.

Iminota 90 isanzwe y’umukino yarangiye amakipe yose anganya ubusa ku busa,maze hongerwaho iminota 30,ikipe ya Sudan iza guhita ibona igitego ku munota w’ijana w’umukino gitsinzwe na Athir Babkiir cyahise kinaba icya 5 atsinze muri iri rushanwa.

Ikipe y’igihugu Amavubi nayo ntiyacitse intege ikomeza gushaka uko yakwishyura,maze ku munota wa 112,Mugiraneza Jean Baptiste yaje guha icyizere abanyarwanda maze abona igitego cyo kwishyura cyahise kiberekeza kuri Penaliti.

Mugiraneza Jean Baptiste watsinze igitego cyo kwishyura yashimiye Imana n’abafana b’Amavubi kuri Facebook

Ikipe ya Sudan yari yakomeje kugaragaza ko ifite icyizere cyo gusezerera u Rwanda kuri Penaliti,gusa Amavubi abifashijwemo na Penaliti 4 zinjijwe na Haluna Niyonzima,Tuyisenge Jacques,Djihad Bizimana,ndetse by’umwihariko na Ndayishimiye Eric Bakame wabashije gukuramo Penaliti ya Sudan,Amavubi yahise abona itike yo gukina umukino wa nyuma kuri uyu wa gatandatu aho bazahura na Uganda yasezereye Ethiopia kuri penaliti.

MENYA UMWANDITSI

Sammy Imanishimwe

Umunyamakuru

@ Samishimwe

Reba inkuru zose nanditse ( 2646 )