Uretse ikipe ya Cote d’Ivoire yabashije gutsinda Ubuyapani ibitego 2-1, andi makipe yose ya Afurika yananiwe kubona intsinzi mu mikino yayo ya mbere mu gikombe cy’isi. Nyuma ya Cameroun yatsinzwe na Mexique 1-0, Nigeria yanganyije ubusa ku busa na Iran yafatwaga nk’ikipe yoroshye cyane mu gikombe cy’isi, Ghana itsindwa na Reta zunze Ubumwe za Amerika, naho Algeria itsindwa n’Ububiligi.

N’ubwo Ububiligi bwagaragaje kwiharira umupira mu mukino wose, Algeria niyo yabanje gufungura amazamu kuri penaliti yatewe na Sofiane Feghouli ku munota wa 24 mu gice cya mbere, amakipe ajya kuruhuka ari igitego kimwe ku busa.

Igice cya kabiri cyaranzwe no gusatira cyane ku ruhande rw’Ububiligi, maze ku munota wa 70 Marouane Fellaini wari winjiye mu kibuga asimbura atsinda igitego cy’umutwe.

Icyo gitego cyatumye Ububiligi bukomeza gusatira cyane mu gihe Algeria yasubiye inyuma cyane kugarira, ariko ntacyo byayifashije cyane kuko ku munota wa 80 Dries Mertens yabatsinze igitego cya kabiri, umukino urangira ari intsinzi y’Ububiligi y’ibitego 2-1.

Iyo ntsinzi yatumye Ububiligi bufata umwanya wa mbere mu itsinda rya munani n’amanota atatu kuri atatu, igakurikirwa n’Uburusiya na Koreya y’Epfo zifite zombi inota rimwe nyuma yo kunganya igitego 1-1 kuri uyu wa gatatu.

Mu itsinda rya mbere hatangiye gukinwa imikino ya kabiri, aho Brazil yakinnye na Mexique amakipe akanganya ubusa ku busa mu minota 90. N’ubwo Brazil yakiniraga imbere y’abakunzi bayo yagerageje ibishoboka byose ngo itsinde ariko Mexique yari ihagaze neza mu bice byose by’ikibuga yitwara neza iyima amanota atatu.

Kunganya na Mexique byatumye Brazil ikomeza kuyobora itsinda rya mbere n’amanota ane inganya na Mexique, naho Cameroun na Croatia zatsinzwe na Mexique na Brazil mu mikino yayo ibanza zikaza ku mwanya wa gatatu n’uwa kane.

Cameroun na Croatia zirahurira mu mukino wazo wa kabiri guhera saa sita z’ijoro, uwo mukino ukaza kubanzirizwa n’indi ibiri yo mu itsinda rya kabiri ariyo; uhuza Australia n’Ubuholandi saa kumi n’ebyiri ndetse n’uhuza Espagne na Chili saa tatu z’umugoroba.

Theoneste Nisingizwe