Al Ahly yamaze gutangaza urutonde rw’abakinnyi izanye guhangana na APR FC

11-03-2015 - 15:11' | Ibitekerezo ( 1 )

Umutoza w’ikipe ya Al Ahly, Juan Garrido yashyize ahagaragara urutonde rw’abakinnyi 20 berekeza i Kigali gukina na APR Fc mu mukino uteganyijwe ku wa gatandatu tariki 14/03/2015 i saa cyenda n’igice (15h30) kuri Stade Amahoro.

Ikipe ya Al Ahly yahagurutse idafite rutahizamu wayo Ahmed Abdel-Zaher ufite ikibazo cy’uburwayi, mu gihe umukinnyi wayo Mohamed ’Gedo’ Nagy wari umaze igihe kigeze ku mezi icyenda adakina yamaze kugaruka mu kibuga ndetse ari no ku rutonde rw’abagomba kwerekeza i Kigali.

Al Ahly yishimira igitego ku mukino wayihuje na ES Setif mu gikombe kiruta ibindi ku mugabane w'Afurika tariki ya 21/02/2015.

Urutonde rw’abakinnyi 20 berekeje i Kigali

Abanyezamu: Sherif Ekrami, Ahmed Adel, Mossaad Awad.

Ba myugariro: Mohamed Naguib, Saad Samir, Sherif Hazem, Bassem Ali, Mohamed Hani, Sabri Rahil, Hussein El-Sayed.

Abakinnyi bo hagati: Hossam Ghaly, Hossam Ashour, Walid Soliman, Abdallah El-Said, Ramadan Sobhi, Mahmoud Hassan "Trezeguet" na Moemen Zakareya.

Ba rutahizamu: Emad Meteb, Peter Ebimobowei na Saladin Said

Al Ahly niyo ya mbere muri Afurika ku rutonde rwa CAF.

Al Ahly imaze kwegukana igikombe cya Orange CAF champions league inshuro umunani.

Si ubwa mbere Al Ahly igiye gukina n’ikipe yo mu Rwanda kuko muri CAF Champions league yo mu 1999, Al Ahly yatsindiye Rayon Sports mu Misiri ibitego 3-0, maze mu mukino wo kwishyura Rayon Sports iyitsinda igitego kimwe ku busa cyatsinzwe na Mbussa Kombi Billy kuri Penaliti.

Sammy IMANISHIMWE