APR FC yatangiye shampiyona yitwara neza, ishaka gukomera ku gikombe yegukanye muri shampiyona iheruka, ibanza gutsinda Marine 2-1, none yakurikijeho AS Muhanga iyitsinda ibitego 2-0.

Igitego cya mbere cya APR FC cyagiyemo ku munota wa 78, gitsinzwe na Rutahizamu Faruk Ruhinda waguzwe mu Isonga FC, ubwo yari agiye mu kibuga asimbura Mubumbyi Bernabe.

Igitego cya kabiri cya APR FC cyaturutse ku mukinnyi wa AS Muhanga Eugene Barakagira utarashoboye kuyobora umupira wari ukomeye uvuye kwa Isaie Songa maze ananirwa gukiza izamu rye, ahubwo umupira uboneza mu izamu ry’ikipe ye ku munota wa 80.

Gutsinda AS Muhanga byatumye APR FC irara ku mwanya wa mbere n’amanota atandatu kuri atandatu, dore ko andi makipe afite amanota atatu ariyo AS Kigali, Amagaju FC na Kiyovu Sport azakina kuri uyu wa gatatu tariki 26/9/2012.

Kuri uyu wa gatatu Rayon Sport irakina na AS Kigali kuri Stade ya Kigali i Nyamirambo, Amagaju akine na Kiyovu Sport i Nyamagabe, Espoir irakira Isonga FC i Rusizi, Marine FC ikine na Police FC Kuri stade Umuganda.

Indi mikino ikinwa kuri uyu wa gatatu, La Jeunesse irakina na Mukura ku Mumena naho Musanze FC igakina na Etincelles kuri Stade Ubworoherane i Musanze.

Theoneste Nisingizwe