Nk’uko twabitanagarijwe na Minsitiri ufite Siporo mu nshingano ze Protais Mitali, ngo batekereje kwagura Stade Amahoro ari na yo stade nini u Rwanda rufite ubu, kugirango ibe nziza ijye ku rwego mpuzamahanga ariko basanga kuyagura byazatwara igihe kinini ndetse cyenda kungana n’icyo kubaka stade nshya.

‘Twaganiriye n’inzobere mu bwubatsi bwa za Stade, batubwira ko kuvugurura Stade Amahoro hongerwa ubunini bwayo bigoye cyane ku buryo igihe n’amafaranga byatwara byenda kungana n’ibyagenda mu kubaka stade nshya. Twafashe rero icyemezo ko tuzubaka indi hanyuma stade Amahoro ikavugururwa biringaniye cyane cyane mugice cyicarwamo n’abanyacyubahiro”.

Ikindi kandi kitatuma bavugurura stade Amahoro ku rwego rwo hejuru ngo ibe nini cyanye, ni uko ngo kuyivugurura byatwara hagati y’imyaka ibiri n’igice n’itatu hagati aho u Rwanda rukaba rwabura aho rwakirira imikino itandukanye yaba ikinwa muri icyo gihe.

N’ubwo Minisitiri Mitali atatangaje itariki nyayo imirimo yo kubaka iyo stade nshya izatangirira n’aho izubakwa, biteganyijwe ko izatangira kubakwa mu gihe gito kuko u Rwanda rugomba kuzakira imikino mpuzamahanga myinshi mu munsi iri imbere harimo n’igikombe cya Afurika cy’ibihugu CHAN muri 2016 nk’uko byamaze kwemezwa n’Impuzamashyirahamwe y’umupira w’amaguru muri Afurika(CAF.)

Kugirango rero u Rwanda rwemererwe kuzakira iyi mikino burundu ni uko ruzaba rufite nibura stade nini ishobora kuba yakwakira abantu ibihumbi mirongo ine (40), igomba gukinirwaho umukino ubanza n’usoza (final).

Ubu u Rwanda rufite stade eshatu zishobora gukinirwaho imikino mpuzamahanga arizo Stade Amahoro, Stade Umuganda yavuguruwe kugira ngo ikinirweho imikino y’igikombe cya Afurika cy’abatarengeje imyaka 17 na stade de Kigali y’i Nyamirambo. Hagati aho kandi harimo no kuvugururwa Stade Huye ishyirwa ku twego mpuzamahanga, Minisiteri ya sport ikaba kandi inafite gahunda yo kuvugurura na stade y’i Muhanga mu rwego rwo gutegura imikino mpuzamahanga no gufasha amakipe kubona ibibuga byiza byo gukiniraho.

Theoneste Nisingizwe