Nyuma y’icyumweru cyari gishize ikipe ya Rayon Sports yirukanye rutahizamu ukomoka muri Ghana Michael Sarpong, yaje kwicarana nawe bukmvikana gutandukana mu bwumvikane ndetse banakora inyandiko ibihamya.

Mu ibaruwa yaturutse mu buyobozi bw’ikipe ya Rayon Sports, hagaragaramo ko Michael Sarpong yagaruye ibikoresho byose by’ikipe, ndetse kandi kimwe n’abandi bakinnyi ba Rayon Sports akaba na we yemeye ko umushahara w’ukwezi kwa kane atazawuhabwa.

Rayon Sports yemereye Michael Sarpong kumwishyura umushahara w’ukwezi kwa gatatu ungana n’ibihumbi Magana acyenda na mirongo itanu mu mafaranga y’u Rwanda (950 000Frws), ndetse anahabwa uduhimbazamusyi tw’imikino itandatu ya Muhanga, Heroes, Gicumbi Mukura na Kiyovu duhwanye n’ibihumbi 175 Frws, nk’uko bigaragara mu ibaruwa.

Ku ruhande rwa Rayon Sports, nayo yemeye kurekera amadorali 615 yari yagurije Michael Sarpong nk’itike yamuvanye Norvege, inavuga ko itazigera imwishyuza ibindi bikoresho by’ikipe atabashije gutanga.

Rayon Sports kandi yemeye ko izaguma kwishyurira Sarpong ubukode bw’inzu abamo kugeza igihe azaba avuye mu Rwanda asubiye iwabo cyangwa se igihe azaba agiye ahandi azahitamo.

Michael Sarpong kandi muri iyi baruwa, yashimiye Rayon Sportsavuga ko yari ayo yatumye aba uwo ari we kugeza uyu munsi, anasaba imbabazi uwo yaba yarabaje wese, anavuga ko Rayon Sports izamuhora ku mutima iteka.