Mu kiganiro n’abanyamakuru cyabaye ku gatatu tariki ya 01 Mata 2015, Umuyobozi w’ishyirahamwe ry’umukino w’amagare mu Rwanda, Aimable Bayingana, yatangaje ko hateguwe irushanwa ritangira ku wa gatandatu tariki ya 04 Mata 2015, rikazaba rigizwe n’amarushanwa 10.

Irushanwa rya mbere rizahaguruka i Muhanga ryerekeza mu Karere ka Rubavu

Uhagarariye Cogebanque, Bayingana, umuyobozi wa Ferwacy n’uhagarariye Skol.

Umuyobozi wa FERWACY, Aimable Bayingana yanatangaje ko impamvu nyamukuru y’iri rushanwa ari uguha amahirwe abakinnyi bo mu gihugu cyose kugaragaza impano bifitemo batari baragize amahirwe yo kugaragaza.

Aimable Bayingana yagize ati “Intego y’aya marushanwa ni ugufasha abakinnyi badakunze kubona amahirwe yo kujya mu ikipe y’igihugu ndetse batabasha no kwitabira amarushanwa kugira ngo babashe kubona umwanya wo kwigaragaza”.

Umuyobozi wa FERWACY, Aimable bayingana avuga ko aya marushanwa azafasha abatagira amahirwe yo kujya mu ikipe y’igihugu kwerekana impano zabo.

Iri rushanwa ryashowemo Milioni zikabakaba 48 rikazajya rihemba muri buri rushanwa abakinnyi makumyabiri ba mbere, aho umukinnyi wa mbere azajya yegukana ibihumbi ijana by’amanyarwanda.

Usibye FERWACY, iri rushanwa rifite abaterankunga babiri b’imena aribo Skol ndetse na COGEBANQUE yasinyanye na FERWACY ubufatanye bw’imyaka itatu.

Uwari uhagarariye Cogebanque mu kiganiro n’abanyamakuru.

Ingengabihe yose y’aya marushanwa

04/04/2015: Muhanga-Rubavu;
02/05/2015: Kigali-Rwamagana ndetse no kuzenguruka Umujyi wa Rwamagana (Iri siganwa rikaba ryaritiriwe kwibuka);
27/06/2015: Time trial mu Karere ka Kicukiro;
28/06/2015: Kigali-Huye;
11/07/2015: Nyamagabe-Nyanza rikaba ryariswe isiganwa ry’umuco;
01/08/2015: Rubavu-Musanze;
22/08 2015: Muhanga-Karongi (kuzenguruka Karongi);
12/09/2015: Kigali- Bugesera (Kuzenguruka Kigali);
Mu kwezi kwa cumi hateganyijwe amarushanwa ane azafasha mu gutegura Tour du Rwanda azaba mu kwezi kwa cumi na kumwe.

Uwari uhagarariye Skol mu kiganiro n’abanyamakuru.

Sammy IMANISHIMWE