Ayo matora yitabiriwe n’abanyeshuli baturutse muri Tanzaniya, Uganda, Burundi, Kenya n’u Rwanda akaba ari nabyo bihugu bigize umuryango w’ibihugu by’Afurika y’uburasirazuba.

Imyanya 32 niyo yahatanirwaga n’ibyo bihugu byose ariko byose siko ayo matora yabihiriye kuko u Rwanda rwihariyemo imyanya 13 yose isigaye yegukanwa n’ibindi bihugu bigize EAC.

Ubuyobozi bukuru bw’ihuriro ry’abanyeshuli biga mu bihugu bigize umuryango w’ibihugu by’Afurika y’uburasirazuba ( EACSU) bwegukanwe n’Umunya-Ugandakazi witwa Nduhukire Sheila wiga muri Kaminuza ya Mbarara.

Uwo mwanya yawusimbuyeho Umunyakenya witwa George Yogo wari usanzwe awuyobora kuva mu mwaka wa 2010.

Nduhukire Sheila yatangaje ko ibikorwa by’iyo komite nshya bizibanda ku guteza imbere imibanire myiza hagati mu rubyiruko rwize n’urutarize rubarizwa mu muryango w’ibihugu bigize EAC.

Yabivuze atya: “igikorwa cyo guhuza urubyiruko rwo mu bihugu bigize umuryango w’Afurika y’uburasirazuba bizafasha kwangura isoko ry’umurimo ndetse buri gihugu kigire ku kindi mu bijyanye n’uko cyakora kugira ngo kirusheho gutera imbere kuruta uko cyari kiri”.

Abanyeshuli b’Abanyarwanda basize bavomereye igiti Perezida Paul Kagame yasize ateye mu busitani bw’inyubako ya EAC mu mujyi wa Arusha.

Steven Nankunda, umwe mu banyeshuli batorewe guhagararira u Rwanda muri EACSU, avuga ko ibitagendaga neza mu banyeshuli biga muri kaminuza n’amashuli makuru bizarushaho gukosorwa muri iyi manda y’imyaka ibiri batorewe.

Uyu munyeshuli wiga muri SFB asobanura ko binyuze muri uwo muryango wa EACSU bagiye kujya kwiga uburyo abarimu b’intiti bajya basaranganwa hagati muri za kaminuza n’amashuli makuru zibarizwa muri ibyo bihugu.

Kayitsinga Alexandre wiga muri INILAK wahoze ahagarariye u Rwanda muri EACSU akaba acyuye igihe yasobanuye ko ibikorwa by’uwo muryango byatumwe hari byinshi bihinduka mu bijyanye n’ireme ry’uburezi butangirwa muri za kaminuza n’amashuli makuru.

Imbere y’inyubako ya EAC muri Arusha bahafatiye ifoto y’urwibutso.

Nk’uwari uyoboye iryo tsinda ry’abanyeshuli b’Abanyarwanda avuga ko ayo matora yagenze neza ndetse Abanyarwanda bagatorwa ari benshi kurusha abandi banyeshuli bo mu bindi bihugu bahahuriye.

Abanyeshuli bitabiriye ayo matora basabye komite nshya yatowe gukomeza kubaka uwo muryango ndetse ibikorwa byawo bigatanga ibisubizo birambye by’ibyo bihugu byose bigize umuryango wa EACSU.

Inyubako y’umuryango wa EAC iri mu mujyi wa Arusha muri Tanzaniya.

Umuryango wa EACSU ufite ibibazo bijyanye n’amategeko asaba ko yavugurwa ndetse nawo ubwawo ugashakirwa ubuzima gatozi.

Ikindi kibazo cy’ingutu uyu muryango ufite ni uko nta bafatanyabikorwa ufite bikaba ari imbogamizi zikomeye ku mikorere yawo kuko ubu igikozwe cyose abanyeshuli bo muri za kaminuza n’amashuli makuru aribo bishakamo ubushobozi mu buryo bwo gutanga imisanzu.

Jean Pierre Twizeyeyezu