Abayobozi b’imijyi ya Rubavu, Goma, Beni, Kinshasa, Bujumbura, Uvira, Bukavu n’umujyi wa Kigali bahuriye mu nama tariki 02/07/2014 basura umupaka muto uhuza Goma na Gisenyi babona bamwe mu Banyarwanda bambuka ariko abandi bagahagarikwa, ikibazo kibangamiye ubuhahirane ku baturage baturiye imipaka.

Abanyarwanda bakoresha umupaka muto uhuza Goma na Gisenyi ndetse n’umupaka wa Rusizi I bakwa amafaranga ya viza ngo babone kwemererwa kwinjira muri Congo nyamara amasezerano y’umuryango CEPGL ibihugu byombi bihuriyemo atabiteganya.

Abayobozi b’imijyi ihuza ibihugu bivuga Igifaransa muri ICGLR basura umupaka uhuza Rubavu na Gisenyi.

Kubera icyo kibazo, abayobozi b’imijyi ihuza imipaka y’ibihugu bivuga igifaransa mu karere k’ibiyaga bigari bashyizeho ihuriro PALPAGL, ngo ibyo bazibandaho mu ihuriro ryabo harimo guharanira amahoro, guharanira imibereho myiza y’abaturage bambukiranya ibihugu, kongera no korohereza ubuhahirane bw’abaturage bambuka imipaka.

Mu ihuriro abayobozi b’imijyi ihuza ibihugu bivuga Igifaransa mu muryango wa ICGLR bavuga ko bashaka gukora imishinga yateza imbere iyi mijyi n’ibihugu byabo.

Akarere ka Rubavu karagaragaje ibikorwa byo kongera ubucyerarugendo no guteza imbere ibidukikije ahatangijwe gutunganya umusozi wa Rubavu uzaba Nyaburanga, mu gihe umujyi wa Goma ugaragaza ko ufite ikibazo cy’amafi kuburyo hakozwe imishinga icyemura icyo kibazo byafasha abatuye Goma.

Abayobozi b’imijyi basura umujyi wa Goma ahari ikibazo cy’amafi.

Indi mishinga ishyirwa imbere abayobozi b’imijyi bifuza ko yatezwa imbere ni imishinga yongera ingufu z’amashanyarazi, imishinga iteza imbere ibikorwa by’amahoro mu karere n’ubuhahirane bwambukiranya imipaka.

Guhuza iyi mijyi no gukorera hamwe bizatanga amahirwe yo kongera imibanire myiza y’abaturage batuye ku mipaka no kugabanya urwangano n’ihohoterwa byakunze kwibonekeza, abayobozi bakaba bashobora guhura no guhana hana amakuru kuburyo umwuka mubi washira hagati y’abatuye ibihugu.

Ihuriro ry’abayobozi b’imijyi ihuza imipaka y’ibihugu bivuga igifaransa mu karere k’ibiyaga bigari (PALPAGL) rwatewe inkunga n’ihuriro ry’abayobozi b’imijyi ihuza ibihugu bivuga Igifaransa ku isi.

Abayobozi b’imijyi bahura n’umuyobozi wa Kivu y’Amajyaruguru, Julien Paluku wababwiye ko bakaza viza Abanyarwanda mu rwego rwo kubahiriza ababwiriza bahawe b’ababakuriye.

Ihuriro ry’abayobozi b’imijyi ihuza ibihugu bivuga Igifaransa ku isi ryatangijwe kuva 2012 kugira ngo rifashe kongera amahoro no gucyemura ibibazo mu bihugu bihana imipaka aho byagize akamaro mu bihugu by’Afurika y’uburengerazuba; nk’uko byasobanuwe n’umunyamabanga wayo M. Pierre Baillet.

Sylidio Sebuharara