Iyo baruwa yasinywe n’umushinjacyaha mukuru muri urwo rukiko Fatou Bensouda, yohererejwe perezida Kenyatta imusaba kwegura agashaka umusimbura kugira ngo bitazateza ikibazo igihe azaba atangiye kuburanishwa mu kwezi kwa 11/2013.

Amakuru dukesha ikinyamakuru “The Kenyan Daily Post” cyandikirwa muri Kenya, avuga ko kuba ubushinjacyaha bwa ICC buri gusaba perezida Uhuru kwegura akanashaka uwamusimbura ku mirimo ye, ari ikimenyetso kigaragariza Abanya-Kenya ko urukiko rwa ICC ari urukiko rwa politiki rwashyizweho n’Abanyaburayi bashaka gukomeza gukoloniza Afurika.

Abanyamategeko n’abakurikiranira hafi ibya politiki ngo basanga icyemezo cya Bensouda kizatuma benshi mu banya-Kenya batakariza icyizere urukiko rwa ICC, kuko bigaragara ko rubogamira ku ruhande rumwe, nk’uko umwe mu banyamategeko yabivuze.

Ati “Kenya ni igihugu gifite ubusugire n’itegeko nshinga bidashobora kugengwa n’amahanga. Iki kibazo gikwiye kuvanwaho kuko gikomeza kutwibutsa ibyo twari tumaze kwibagirwa kandi bigashyushya imitwe y’abantu”.

Perezida Uhuru Kenyatta na visi perezida we William Ruto baregwa uruhare mu bwicanyi n’ibikorwa by’urugomo byakurikiye amatora y’umukuru w’igihugu yabaye mu mwaka wa 2007. Biteganyijwe ko urubanza rwa perezida Uhuru Kenyatta rutangira tariki 12 Ugushyingo 2013 ku cyicaro cy’urukiko mpuzamahanga mpanabyaha, ICC.

Cyprien M. Ngendahimana