Mu nama y’iminsi itatu ibera i Kigali yatangiye kuri uyu wa 28 Ukwakira 2015, ihuje abakuriye Umuryango Nyafurika w’Ubucuruzi (OATUU), amasendika y’abakozi n’abayobozi batandukanye, bibanze ku miyoborere myiza na demokarasi muri Afurika kuko ari byo bizatuma ibibazo bihari bikemuka.

Minisitiri Busingye avuga ko imiyoborere myiza ari yo rufunguzo rw’ubukungu bw’Afurika.

Iyi nama ifite insanganyamatsiko igira iti "Dukangurire Abanyafurika guhindura Afurika " binyujijwe mu miyoborere myiza na demokarasi.

Minisitiri w’Ubutabera akaba n’Intumwa nkuru ya Leta, Jonhston Busingye, yavuze ko imiyoborere myiza ari rwo rufunguzo rw’ubukungu bwa Afurika.

Yagize ati “Ubuyobozi bwiza bwegereye abaturage ni yo mbarutso y’iterambere ry’Abanyafurika kuko bituma buri muntu abyiyumvamo, cyane ko aba yabigizemo uruhare, akaboneraho gutera imbere".

Yakokomeje avuga ko hari ibihugu byari biri inyuma y’iby’Afurika mu bukungu mu mwaka w’1950 none ubu ngo ni byo biyitera inkunga, ni byo bibazwa ikigomba gukorwa. Aha yatanze urugero ku gihugu cya Koreya y’Amajyepfo akurikije ukuntu cyihuse mu iterambere. Ati “Abanyafrika turabura iki?”

Abanyafurika ngo ni bo bagomba kuyikura mu bukene.

Umunyamabanga Mukuru w’iIhyirahamwe Nyafurika ry’Abacuruzi, Arezki Mezhoud, yavuze ko bibabaje kuba Afrika ari yo igihabwa inkunga nyinshi ku isi.

Mezhoud ati "Ntibyumvikana ukuntu mu bihugu 42 bihabwa infashanyo ihoraho n’Umuryango w’Abibumbye, 35 ari iby’Afurika kandi ari yo ifite ubukungu bwinshi ariko buryamye.

Akomeza avuga ko nubwo abayobozi b’Afurika bakoresha imbaraga nyinshi ngo bayiteze imbere, kugeza ubu ngo nta kintu kigaragara igeraho kuko ikizitiwe n’ubukene, ihohoterwa, intambara, ubuhunzi, indwara zitandukanye na ruswa, bikaba ari byo bituma ihora igenerwa inkunga.

Yongeraho ko iyi nama igamije gukangurira Abanyafurika guhaguruka bagashyira imbaraga hamwe, bakava mu magambo bagashyira ibikorwa imbere, ngo nta kizabuza Afurika kwigobotora ubukene.

Munyantore Jean Claude