Ni ku nshuro ya 12 uyu muryango ukoze igikorwa cyo gufasha abakobwa babyariye iwabo batishoboye. Kuri iyi nshuro, iki gikorwa cyabaye umwanya wo kugaragaza umusaruro umaze kugerwaho no kongera gusaba ubufatanye mu gukomeza gufasha abakiri mu bibazo.

Uyu muhango witabiriwe n’abayobozi b’inzego za Leta, abahagarariye amatorero, abafatanyabikorwa n’ababyeyi.

Aha, hatanzwe ubutumwa butandukanye bushimangira uruhare rw’uyu muryango mu iterambere ry’abakobwa.

Mu ijambo rye, Ndayisaba Jean de Dieu wari uhagarariye Umunyamabanga Nshingwabikorwa w’Umurenge wa Bumbogo mu Mujyi wa Kigali, ari naho gahunda yabereye, yashimiye abakobwa bagize umuhate wo guhindura ubuzima bwabo bakava mu ngeso mbi, abasaba gukomeza iyo nzira yo kwiteza imbere no kudasubira inyuma.

Yagaragaje ko impinduka mu mitekerereze ari inkingi y’iterambere rirambye.

Yagize ati: “Guhinduka ntibigarukira ku byo mwize gusa, ahubwo bikwiye no kugaragara mu mibereho yanyu ya buri munsi. Mukomeze mukore cyane, mwirinde icyabasubiza inyuma.”

Abanyeshuri barangije amasomo bagaragaje ko hari byinshi bungutse byabafashije gutangira ubuzima bushya.

Irakoze Marie Rose wavuze mu izina ryabo, yavuze ko bize imyuga irimo gusuka, gukora inzara no gutunganya ubwiza (manicure na pedicure), bikaba byaratumye batangira kwitunga.

Yagize ati: “Twari turi mu buzima bugoye, ariko ubu dufite icyizere cy’ejo hazaza. Turabona amafaranga adufasha kwiyubaka no kwita ku bana bacu.”

Yongeyeho ko batagishukwa n’ababashoraga mu ngeso mbi, ashimira ubuyobozi bwa Kura Organisation bwabafashije guhindura imitekerereze no kwigirira icyizere.

Umuyobozi wa Kura Organisation, Nyirakinyana Chantal uzwi nka Mama Joy, yashimiwe cyane ku bw’uruhare rwe mu kuzamura imibereho y’aba bakobwa. Abanyeshuri bamushimiye bamugaragaza nk’umubyeyi wabakuye mu buzima bubi akabafasha kongera kwiyubaka.

Kuva washingwa mu 2013, Kura Organisation igamije gufasha abakobwa babyariye iwabo batishoboye kwiyubaka binyuze mu myigire y’imyuga no kubaha uburere bubafasha guhindura imitekerereze.

Uyu muryango watangiriye mu Busanza, nyuma ukomereza ibikorwa byawo i Masizi mu Murenge wa Bumbogo, aho wagendaga waguka buhoro buhoro, ukazakomereza no mu tundi turere, uko ubushobozi buzagenda buboneka.

Mu masomo atangwa harimo gusuka, gukora inzara, gutunganya ubwiza, hari n’abandi bize kudoda mu bihe byashize.

Aya masomo amara amezi atandatu, aho abanyeshuri biga buri munsi kuva ku wa mbere kugeza ku wa gatanu.

Uretse imyuga, uyu muryango unashyira imbaraga mu kubaka indangagaciro z’abanyeshuri.

Buri munsi amasomo atangira habanza isaha yo kwegera Imana, aho abanyeshuri basenga, bakaririmba kandi bakiga ijambo ry’Imana.

Ubuyobozi buvuga ko ibi byagize uruhare rukomeye mu mpinduka zigaragara mu myitwarire y’aba bakobwa.

Abanyeshuri 54 ni bo batangiye amasomo, ariko 35 ni bo bayarangije neza nyuma ya stage yatangiye tariki ya 20 Kanama 2025 ikarangira muri Mata 2026.

Nubwo hari abagiye bavamo bitewe n’impamvu zitandukanye zirimo imibereho igoye, ubuyobozi buvuga ko intambwe yatewe ishimishije.

Abayobozi n’abafatanyabikorwa basabwe gukomeza gushyigikira ibikorwa by’uyu muryango, haba mu bitekerezo, amasengesho, ibikoresho ndetse n’amikoro, kugira ngo ibikorwa byawo bigere kuri benshi kurushaho.

Ubuyobozi bwa Kura Organisation bwatangaje ko bufite gahunda yo gukomeza kwakira ibindi byiciro by’abakobwa, hagamijwe kubafasha kuva mu buzima bwo kwiheba no kwigunga, bakagira uruhare rugaragara mu iterambere ry’igihugu.

Bwagaragaje ko, n’ubwo hari abakobwa benshi bakiri mu bibazo by’ubukene n’ingeso mbi, ubufatanye bw’inzego zitandukanye bushobora gutuma icyo kibazo kigabanuka ku buryo bugaragara.

Iki gikorwa cyasojwe n’ubutumwa bushishikariza buri wese kugira uruhare mu guteza imbere umwana w’umukobwa, hagamijwe kubaka igihugu gifite abaturage bafite agaciro, ubushobozi n’icyizere cy’ejo hazaza.