Julia Pierson w’imyaka 53 y’amavuko yatowe tariki 26/03/2013, asimbuye Mark Sullivan, wari umaze iminsi anengwa cyane kudashyira abakozi be ku murongo. Mu kazi ashinzwe harimo kurinda umuryango wa Perezida wa Amerika ndetse n’abandi bayobozi bakuru.

Julia Pierson, yatangiye akazi ke ko gucunga umutekano ubwo yinjiraga mu gipolisi cy’America muri Leta ya Orlando, nyuma aza kuba umwe mu bagize ingabo zidasanzwe (Special Force) muri Leta ya Miami. Ubu ni we wari ukuriye Special Force ya Miami.

Perezida Barack Obama amaze guhitamo uriya mudamu, yagize ati: “Julia afite ibisabwa byose kugira ngo abashe kuyobora ibiro bifite akazi katoroshye ko kurinda Abanyamerika mu minsi y’ibirori, kubungabunga ubukungu bwacu, no kurinda imiryango y’abayobozi ndetse n’uwanjye urimo.

Julia yaranzwe no kuba intangarugero mu kazi yagiye akora kandi nizeye ntashidikanya ko uburambe afite buzamufasha gutunganya imirimo mishya ashinzwe aho agiye kuyobora abagore n’abagabo basanzwe bazwiho gukorana umurava”.

Julia Pierson agizwe umuyobozi mushya w’umutwe ushinzwe kurinda Perezida wa Amerika, mu gihe uwo mutwe wari umaze iminsi uri mu kimwaro cy’abakozi bawo 12 bafatiwe mu cyuho muri Mata 2012 bagiye kwishakira indaya mu gihugu cya Colombia, hasigaye akanya gato ngo Barack Obama ahagere mu ruzinduko rw’akazi.

Gasana Marcellin