Yarahiriye imbere y’Inteko Ishinga Amategeko y’Ububiligi, igizwe n’abadepite b’abafulama bahagarariye miliyoni 6 z’abaturage bavuga Igifulama, ndetse n’abadepite b’Abawalo bavuga igifaransa bahagarariye miliyoni 4,5 z’abaturage.

Umwami Philippe I yagize ati: "Ubutunzi bw’igihugu cyacyu n’inzego z’ubuyobozi bwacu bishingiye ku gufata ibidutandukanya tukabibyaza imbaraga zo kubaka igihugu."

Umuhango wo kwimika Umwami Philippe I wabaye n’umwanya wo gusoza inzibacyuho mu Bubiligi, aho umwami Albert w’imyaka 79 yashyize umukono ku nyandiko isezera ku ngoma y’ubwami nk’umuyobozi mukuru w’igihugu mu buryo bw’umuco.

Umuhango wabereye imbere ya Ministre w’Intebe w’Ububiligi, Elio Di Rupo, ari nawe ufite ubuyobozi bw’igihugu mu rwego rwa politike.

Albert yatangaje iyegura rye hasigaye ibyumweru bitagera kuri bitatu, ku buryo nta mwanya wari uhari wo gutegura ibirori byo kwimika umuhungu we Philippe I ngo bikorwe mu rwego mpuzamahanga, kandi nta bandi bayobozi b’ibwami bo mu bindi bihugu bari bahari.

Ariko kubera ko umuhango wahuriranye n’umunsi mukuru w’Ababiligi, akarasisi k’ingabo ko kari kamaze gutegurwa na mbere.

Gasana Marcellin