Imibare y’abandura Covid-19 ku isi yarazamutse mu cyumweru gishize

Ishami ry’Umuryango w’Abibumbye ryita ku buzima (WHO), ritangaza ko imibare y’abandura Covid-19 ku rwego rw’isi yazamutse mu cyumweru gishize, ibyo bikaba ari ubwa mbere bibayeho mu byumweru birindwi bishize.

Dr Tedros asaba ibihugu kutirara kubera urukingo ngo bidohoke ku kwirinda Covid-19
Dr Tedros asaba ibihugu kutirara kubera urukingo ngo bidohoke ku kwirinda Covid-19

Umuyobozi wa ‘WHO’ Tedros Adhanom Ghebreyesus, yavuze ko kuzamuka kw’imibare y’abandura Covid-19 bibabaje ariko bidatangaje. Yongeraho ko imibare y’abandura Covid-19 yazamutse hirya no hino ku isi uretse muri Afurika no mu Karere ka Pacifique y’Iburengerazuba.

Tedros yagize ati “Ku ruhande rumwe bigaragara ko byatewe no gutezuka ku ngamba zo kwirinda Covid-19, hamwe na hamwe inkingo zikomeje gukwirakwizwa ari ko n’abantu bagabanyije uburyo birinda”.

Ku ruhande rwa Maria Van Kerkhove, uyoboye itsinda rishinzwe kurwanya COVID-19 mu Ishami ry’Umuryango w’Abibumbye yavuze ko “ icyo ari ikintu kituburira twese”, nyuma yongeraho ati “ Iyi virusi izongera ituzamukane nituyemerera, kandi ntabwo twayemerera”.

Kugeza ku itariki ya 1 Werurwe 2021, abamaze kwandura Coronavirus bagera kuri Miliyoni 114, impfu zifitanye isano nayo zigera kuri Miliyoni 2.5 mu gihe abamaze kuyikira bagera kuri miliyoni 64.5 nk’uko bigaragazwa n’imibare itangwa na Kaminuza ya Johns Hopkins University.

Tedros yavuze ko hakiri kare kuba Guverinoma z’ibihugu zakwishingikiriza ku rukingo rwabonetse, nyuma zigahita zireka ingamba zo kwirinda icyorezo cya Covid-19.

Tedros ati “Niba ibihugu byishingikirije ku rukingo gusa birimo gukora amakosa. Kubahiriza ingamba zo kwirinda ni cyo gisubizo”.

Umuyobozi wa WHO yavuze ko muri Afurika gutanga inkingo nibura birimo kugera ku bibasirwa cyane n’icyorezo nk’abaganga, Ghana na Côte d’Ivoire byo ngo biratanga icyizere kuko ku itariki ya 1 Werurwe 2021, ibyo bihugu byabaye ibya mbere bitangiye gukingira abantu Covid-19 bikoresheje inkingo byahawe muri gahunda ya COVAX.

Iyo ikaba ari gahunda mpuzamahanga yo kugeza inkingo za Covid-19 ku bihugu bikennye n’ibifite amikoro aciriritse.

Umuyobozi wa WHO kandi yanenze ibihugu bikize byiharira inkingo za Covid-19, avuga ko ari inyungu ya buri wese kubona n’abantu bakennye hirya no hino ku isi bakingirwa.

Tedros ati “Birababaje ukuntu iyi mibare izamutse nyuma y’amezi atatu ibihugu bikize bitangiye ubukangurambaga bwo gukingira abaturage babyo”.

WHO kandi itangaza ko biteganijwe ko ukwezi kwa Gicurasi 2021, kuzarangira inkingo za Covid-19 zigera kuri Miliyoni 237 zimaze gutangwa mu bihugu 142 bikennye kurusha ibindi.

Shakisha izindi nkuru
kigalitoday android app mobile

Ibitekerezo  

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka