Kigali Today ivugana n’umuyobozi w’Akagari ka Hehu umusozi wa Hehu uherereyemo, Nsengiyera Claude, yemeje aya makuru avuga ko yabwiwe n’abaturage ko babyutse bajya guca ubwatsi ahakuwe ingabo za FARDC bagatungurwa no kuzihasanga, nawe yabigenzura agasanga ari byo.

Akomeza agira ati “Turabifata nko kwigomeka no gushaka ubushotaronyi, kuko bari kubikora nkana kandi bazi ko atari mu gihugu cyabo”.

Tariki ya 27 Mata 2015, nibwo impuguke zihuriweho n’ibihugu byombi zishinzwe gusubizaho imbago zashyizweho mu w’1911 zeretse ingabo za FARDC zari zimaze iminsi ine zigabije ubutaka bw’u Rwanda aho imbago igabanya u Rwanda na RDC iherereye.

Iri tsinda rishinga imbago ya 22 ihuza u Rwanda na RDC, ryagaragaje ko ingabo za FARDC zacukuye indaki mu Rwanda zirengereye metero zirenga icumi zivuye ku butaka bwayo zikinjira mu Rwanda.

Rwayitare Esdras ukuriye impuguke z’u Rwanda yasobanuye ko nyuma yo gushinga imbago hagomba kubarwa ubutaka butagira nyirabwo kuri buri ruhande bungana na metero 6,25 zitagomba kugira igikorerwamo, bivuze ko ingabo za RDC zarenze ubutaka butagira nyirabwo ku ruhande rw’ u Rwanda zikinjira mu gihugu cy’u Rwanda.

Ubwo ingabo za FARDC zerekwaga imbago ndetse zigasobanurirwa aho zitagombye kurenga, umuyobozi uzikuriye ufite ipeti rya Majoro yavugaga ko bagomba kuhava bahawe uburenganzira n’ubuyobozi bwa Kinshasa, ariko ubuyobozi bw’ingabo z’u Rwanda bubasaba kuva ku butaka bw’u Rwanda nyuma yo kwerekwa umupaka aho ugarukira.

Abaturage batuye mu Kagari ka Hehu bavuga ko aho ingabo z’u Rwanda ziri zitegereye Abanyekongo kuko ziri ku musozi uteganye n’uwa Hehu ugabanya u Rwanda na RDC.

Sylidio Sebuharara