Iki kibazo cy’amafaranga yunganira abanyeshuri mu myigire bita “buruse” gifitwe n’abanyeshuri bishyurirwa n’Ikigo cy’Igihugu gishinzwe Uburezi (REB) ndetse n’Ikigega cya Leta gifasha abacitse ku icumu rya Jenoside yakorewe Abatutsi mu w’i 1994 (FARG).

Umuyobozi w’Agateganyo wa Musanze Polytechnic,Eng Abayayisenga Emile, yizeza abanyeshuri ko amafaranga ya buruse bayategereje muri iki cyumweru ngo bashobora kuyabona.

Umwe mu banyeshuri w’imfubyi ufashwa na FARG agira ati “Nkimara kumenya ko nzaza hano FARG yatubwiye ko izaduha inguzanyo zikadufasha mu buzima bwa buri munsi. Kuva twaza ku itariki 30 z’ukwezi kwa Gatatu nta buruse twigeze tubona ukibaza nk’imfubyi ubuzima bwa buri munsi ni ikibazo.”

Buri munyeshuri wemerewe kurihirirwa na Leta ku nguzanyo ya buruse ahabwa amafaranga y’u Rwanda ibihumbi 25 amufasha kwishyura amafunguro ndetse n’icumbi kugira ngo abashe kwiga neza.

Nubwo bategereje amafaranga ya buruse amaso akaba yaraheze mu kirere, bagaragaraza ko batumva ukuntu ishuri ribishyuza amafaranga y’amacumbi kandi agomba kuva ku mafaranga ya buruse batarabona.

Bamwe mu banyeshuri barayatanze mu gihe abandi bandikira ubuyobozi bw’ishuri, bavuga igihe bazayatangira. Bo babifata nk’akarengane kandi ishuri rizi neza ikibazo cya buruse bafite.

Musanze Polytechnic iri mu mashuri makuru afite inyubako nziza zigaragaza ko ryaba ari ishuri ryiza.

Umuyobozi w’Ishuri rya Musanze Polytechnic, Eng. Abayisenga Emile, avuga ko REB yashyize amafaranga ya buruse y’ukwezi kwa Mata, Gicurasi na Kamena kuri konti ya WDA muri Kamena mu gihe bo bari batarabona konti y’ishuri maze itinda kubimenya umwaka w’ingengo y’imari urangiye MINECOFIN irayatwara.

Ngo hari ibiganiro byo kureba uko ayo mafaranga yahabwa abanyeshuri. Kuri buruse y’andi mezi asigaye, icyakora arema agatima abanyeshuri ko iri hafi kubageraho agira ati “Ubu REB yishyuye ukwezi kwa Karindwi, ukwa Munani n’ukwa Cyenda mu cyumweru gishize amafaranga yari yageze muri MINECOFIN twebwe tuyategereje muri iki cyumweru.”

Ku kibazo cyo kwishyuza amacumbi, Eng. Abayisenga yemera ko babishyuza koko ariko akavuga ko nta munyeshuri wabuzwa kwiga kuko atarishyura ngo k’uyabuze bategereza bakazayakura kuri buruse.

NSHIMIYIMANA Leonard