Mu kugaragaza ubushake bwo kumutahura aho yihishe hose muri Zimbabwe, Guverinoma yashyizeho igihembo cy’amadolari ya Amerika miliyoni eshanu ku muturage uzatanga amakuru y’aho uwo mugabo ugendera ku mazina y’amahimbano yihishe muri Zimbabwe.

Umukuru w’ishami rya polisi rishinzwe gukumira ibyaha, Chief Superintendant Peter Magwenzi yabwiye radio Voice of The People yo muri Zimbabwe ko Protais Mpiranya ashobora kuba ari muzi Zimbabwe aho yiyise amazina menshi arimo Theophase Mahuku, James Kakule ngo ajijishe ababasha kumumenya.

Protais Mpiranya wahoze ari umusirikare mukuru mu mutwe warindaga Perezida Habyarimana, akekwaho kuba yaragize uruhare rukomeye mu gutegura no gukora Jenoside yakorewe Abatutsi mu Rwanda mu 1994.

Umutwe w’abasirikare yari ayoboye ni nawo uvugwaho ko wishe uwari minisitiri w’Intebe Uwiringiyimana Agatha n’abasirikari 10 b’Abababiligi bari mu ngabo za MINUAR.

Urukiko mpuzamahanga mpanabyaha rwashyiriweho u Rwanda (ICTR) rwari rumaze igihe rushinja Leta ya Zimbabwe kuba itagaragaza ubushake mu gufata Mpiranya ukekwaho kwihisha muri icyo gihugu. Leta ya Zimbabwe ariko yakomeje kubihakana yivuye inyuma.

Mu kwezi gushize, umushinjacyaha mukuru wa ICTR, Hassan Bubacar Jallow, yari yandikiye umuryango w’abibumbye ashimangira ko hari amakuru ko Zimbabwe ikingira ikibaba Mpiranya.

Umuyobozi w’urwego rushinzwe abinjira n’abasohoka muri Zimbabwe, Clemence Masango yari aherutse guhakanira abadepite ba Zimbabwe ko mu makuru Zimbabwe ifite nta muntu witwa Mpiranya wigeze agera ku butaka bwayo.

Uyu muyobozi yagiraga ati “Amagambo nk’ayo amaze igihe avugwa ariko nta muntu n’umwe tuzi mubo twakiriye ku butaka bwacu witwa ayo mazina, haba mu nkambi z’impunzi cyangwa mu bantu bagenderera igihugu cyacu mu buryo busanzwe.”

Jean d’Amour Ahishakiye