Nyirakamana amaze kuza i Congo Nil mu karere ka Rutsiro inshuro enye ku murwa w’umubyeyi Bikira Mariya azanywe no kumugezaho ibyifuzo bye. Tariki 14/08/2013 yagarutse kumushimira ko bimwe byakemutse no kumusaba ko undi mwana we warangije ayisumbuye na we yamufasha akabona akazi.

Nyirakamana na bagenzi be bagera kuri 300 baturutse iwabo mu murenge wa Busasamana mu karere ka Rubavu tariki 13/08/2013 saa kumi za mugitondo bagera i Murunda mu karere ka Rutsiro saa kumi n’ebyiri z’umugoroba bararayo, mu gitondo barakomeza baragenda bagera i Congo Nil saa yine z’amanywa.

Nyirakamana w’umupfakazi akaba arera abana batanu yemera ko iyo yaje ku murwa w’umubyeyi Bikira Mariya amugezaho icyifuzo yasubira mu rugo agasanga yagishubije nyuma akazagaruka kumushimira.

Mu gihe babiri muri abo bana bigaga mu mashuri yisumbuye, ngo yabuze amafaranga yo kubarihira, yerekeza i Congo Nil kugeza icyo kibazo ku Mubyeyi Bikira Mariya. Ati “Noneho ndavuga nti none Mubyeyi, aba bana ko ntazabona amafaranga yo kubarihira bizagenda gute?”

Yemeza ko yabonye igitangaza cy’umubyeyi Bikira Mariya akinyujije mu bitekerezo yamwunguye byo guhinga amashu, ibirayi n’ibitunguru abijyana ku isoko abona abaguzi bamuha amafaranga bityo abasha kubona amafaranga yo kwishyurira abanyeshuri.

Ati “ubu abana babiri bararangije, urumva ko yanshubije!” Bamaze kurangiza yagarutse aje gushimira umubyeyi Bikira Mariya ariko yongera kumusaba n’ikindi kintu. Ati “None Mubyeyi Bikira Mariya ko ba bana barangije none akazi kakaba karabuze, wabahaye akazi!”

Umwana umwe ngo yahise amusubiza amuha akazi, akaba arimo kwigisha mu mashuri yisumbuye. Nyirakamana avuga ko kuri iyi nshuro yongeye kugaruka azanywe no kumushimira no kumusaba ko undi na we usigaye yabona akazi.

Tariki 15 Kanama ni umwe mu minsi mikuru ikomeye muri kiliziya gatulika, aho abakirisitu gaturika bizihiza ijyanwa mu ijuru rya Bikira Mariya, by’umwihariko abo muri diyoseze ya Nyundo bakaba bateranira i Congo Nil mu karere ka Rutsiro ku murwa w’umubyeyi Bikira Mariya.

Muri uyu mwaka wa 2013, abagera ku bihumbi 20 bo muri diyoseze ya Nyundo baturutse hirya no hino mu maparuwasi 23 agize diyoseze ya Nyundo mu turere dutandatu tw’intara y’Iburengerazuba (usibye akarere kamwe ka Rusizi) ari two Nyamasheke, Karongi, Rutsiro, Ngororero, Nyabihu na Rubavu, bahuriye aho i Congo Nil.

Umwepisikopi wa mbere wa Diyoseze ya Nyundo, Musenyeri Aloys Bigirumwami ni we wemeje ko aho i Congo Nil hubakwa ingoro y’umubyeyi Bikira Mariya, umubyeyi w’abakene mu mwaka w’1954, bityo abakirisitu gatulika bo muri diyoseze ya Nyundo bakajya bahateranira ku munsi mukuru wa Asomusiyo, aho bamwe muri bo bizera ko iyo bahageze babasha gusabana no kugeza ibyifuzo bafite kuri Bikira Mariya.

Kubera ko abenshi baturuka kure, impamba bitwaje bakayimara bakiri mu nzira, bazana n’ibindi biribwa bibisi n’ibikoresho byo gutekeramo, bahagera bagategura n’ibindi byo kubatunga.

Malachie Hakizimana