Muhindo Patrick ufite imyaka 19, yavukiye muri FDLR ayikuriramo, ariko ngoiyo asubije amaso inyuma yarataye igihe kinini cy’ubuzima bwe mu mashyamba kandi nta nyungu abona.

“Mu gihe cyose namaze muri FDLR kuva namenya ubwenge ntakiza nigeze mbona uretse intambara n’imihangayiko. Nabuze ababyeyi nkiri muto, sinashoboye kwiga. None ntashye mu gihugu cyanjye kugira ngo nzashobore kwiga.”

Bamwe mu barwanyi bitandukanyije na FDLR batashye mu Rwanda

Yari umurwanyi wa FDLR/Foca abana na Col Vumilia n’abandi barwanyi 40 bari mu Bwiza, aho barindiye umutekano abarwanyi ba Segiteri Kanani iyobowe na Gaheza uzwi nka Gen Omega na Col Serge bari muri Masisi.

Muhindo avuga ko yafashe icyemezo cyo kuza mu Rwanda kuko yabonaga ntakiza akura mu mashyamba uretse intambara zidashira zashoboraga no gutwara ubuzima bwe atamenye igihugu cye. Avuga ko n’ubu izo ntambara zigikomeje kuko atashye FDLR yitegura kurasana n’ingabo za Congo Kinshasa.

Muhindo atashye mu Rwanda asanga umuvandimwe we mu murenge wa Busasamana akarere ka Rubavu, ari na we wamushishikarije gutaha amubwira ko mu Rwanda ari heza bitandukanye n’ibyo yigishijwe mu mashyamba yabagamo.

Abarwanyi ba FDLR batashye mu Rwanda n’imiryango yabo

Nyuma yo gutahuka, Muhindo avuga ko agiye kubaho akoresheje amaboko n’umutwe we, aho guhora ata umwanya mu mashyamba kandi igihugu cye gitekanye kinatera imbere mu bukungu.

Umugambi wa mbere afite ngo ni ukugana ishuri akamenya gusoma no kwandika, ndetse agashobora no kuba yakomeza amashuri makuru na kaminuza, kuko igihe amaze muri FDLR atigeze amenya icyo kugana ishuri ari cyo.

Muhindo yatashye mu Rwanda ari kumwe n’abandi basore 10 bitandukanyije n’umutwe wa FDLR Foca, barimo Hagenimana Jean Claude watashye ava mu Kirunga cya Nyamuragira ahitwa Gitsimbi. Yabaga mu itsinda ryitwa Macab ayobowe na Col Ruhinda uzwi ku izina rya Zolo, nawe wunga mu rya Muhindo ko bataye igihe kinini mu mashyamba.

Sylidio Sebuharara