Uyu musore yemera ko anywa urumogi akanarucuruza ariko akavuga ko atari ikiyobyabwenge kuko iyo yarunyweye agubwa neza ndetse agasobanura ko yafungwa cyangwa yafungurwa azaharanira uburenganzira bw’abanywa urumogi kugeza babubonye.

Uyu musore ubusanzwe ukomoka mu karere ka Rutsiro tariki 13/06/2013 yagaragajwe mu karere ka Nyamasheke nk’urugero rw’umuntu wanyweye ibiyobyabwenge bikagira ubwo bimugira imbata ku buryo atacyumva ko no kubinywa ari amakosa.

Kigali Today yaganiriye n’uyu musore wiyemerera ko anywa urumogi ariko akavuga ko atumvikana n’abarwita ikiyobyabwenge.

Mu mvugo ye, avuga amagambo wumva atyaye kandi nta mususu, ndetse n’ibitekerezo bigiye ku murongo bishimangira akamaro ku kunywa urumogi kuri we n’abasangirangendo be kandi akavuga ko kuba abantu benshi barwamagana ari byo byamuteye gufata umugambi wo kuvuganira abarukoresha ngo kuko yasanze ari benshi kandi baba ahantu hose yageze.

Cyakora iyo umubajije icyo kurunywa bimumariye, agira ati “None se wowe iyo unyweye Fanta wunguka iki?! Ni ibyishimo nyine.”
Uyu musore avuga ko yatangiye kunywa urumogi afite imyaka 7, kugeza ubu muri 2013, akaba amaze imyaka 18 arunywa kandi ngo ntacyo rwigeze rumukoresha kibi muri iyi myaka yose.

Mu magambo ye agira ati “Nararunyweye, naba narunyweye nkumva nta kibazo. Na kwa kundi bavuga ngo ruteza umuntu kurwana cyangwa gutukana, ibyongibyo nta mutima wigeze ubintegeka ahubwo jye nararunywaga nkumva mu mutima wanjye ntekanye mfite amahoro, nkumva ko n’umuntu wamvugisha namuhunga nkigendera… N’umuntu yarantukaga naba narunyweye nkamuhunga nkagenda ariko naba ntarunyweye tugaserera.”

Mu byumweru bibiri bishize ni bwo Urukiko rw’Ibanze rwa Kagano mu karere ka Nyamasheke rwamuhamije ibyaha bijyanye no kunywa ibiyobyabwenge no kubikwirakwiza, rumukatira igifungo cy’imyaka 5 n’ihazabu y’amafaranga ibihumbi 500 nk’uko abivuga.

Icyo impuguke zisobanura ikibazo cye

Rugira Aimée Jerome ni Impuguke mu bijyanye n’imitekerereze ya muntu (Clinical Psychology) akaba ari Umwarimu muri Kaminuza ya Kibogora ndetse akaba n’Umuganga mu Ishami ry’indwara zo mu mutwe ku Bitaro bya Kibogora.

Yadusobanuriye ko akenshi bene ibi biterwa n’ubwonko bw’umuntu wahuye n’ibibazo by’uruhererekane rw’icyaha, bikamutera inkomanga ku mutima noneho byamara kumubata akabishakira ubusobanuro kugira ngo ajye abikora nta nkomanga afite.

Agira ati “Ubwonko bw’umuntu buvuga kuruta uko twebwe tuvuga. Iyo umuntu ahuye n’ibibazo, cyane cyane ibibazo bigaragara ko ari icyaha, bitera inkomanga ku mutima. Iyo bikomeje kukwizingiraho bikagaruka inshuro nyinshi bisaba ko nyir’ukubikora abishakira ubusobanuro kugira ngo akomeze kubikora nta nkomanga afite.

Umuntu nk’uwo rero uvuga ko asaba uburenganzira bwo kugira ngo akomeze kunywa ibiyobyabwenge biterwa n’icyo bita ‘Dependance’; aba yarabinyweye igihe kirekire akageza ubwo yumva ubuzima bwe bwararundukiye muri icyo kintu.

Iyo hagize umusaba kubireka yumva ubuzima bwe bwaba burangiye. Ntabwo ari uko atazi ko amategeko abihana cyangwa se ko atari bibi ahubwo we yifuza ko abantu bose bakumva ko ibyo bintu byakomeza kubaho kugira ngo yihamire muri uwo muco.”

Rugira yongeraho ko umuntu ugejeje kuri iyi ntera, hari igihe abona abantu bake bakora nk’ibyo akora agahita yiremamo ishusho y’uko abantu benshi babikora.

Iyi mpuguke itanga inama z’uko umuntu wageze kuri uru rwego ashobora kuvurwa agakira mu gihe ahuye n’abahanga mu by’imitekerereze ya muntu ku buryo bajya baganira akazagera ubwo asubira ku murongo. Cyakora ngo bishobora gufata igihe ariko bigashoboka, nk’uko Rugira abivuga.

Uwashingira ku butumwa bw’inzego zitandukanye ndetse n’ibyo abahanga bavuga yakwemeza ko ibiyobyabwenge bishobora guhindura imbata uwabifashe igihe kirekire; bityo agakangurira abantu kubyirinda kuko uwamaze kubyinjiramo biba bigoye kubireka.

Emmanuel Ntivuguruzwa