Nyirimbuga wari ufite imyaka 33 mu gihe yagiraga uruhare muri Jenoside yakorewe Abatutsi agira ati “Nijanditse muri Jenoside nica abavandimwe ndi urubyiruko. Ndagira ngo mbabwire nyabuna ntihazagire uboshya ngo mwice abavandimwe banyu mugendeye ku ngengabitekerezo y’amoko”.

Uyu mugabo ubu ufite imyaka 53 asaba urubyiruko kwimika urukundo rugatahiriza umugozi umwe mu kubaka u Rwanda nk’Abanyarwanda, ndetse bakanashyigikira gahunda ya “Ndi Umunyarwanda”.

“Mureke tube Abanyarwanda, twubake “Ndi Umunyarwanda”, dufatanyirize hamwe twubake igihugu cyacu,” Nyirimbuga.

Uretse urubyiruko, Nyirimbuga agira n’inama abantu bakuru bafite imiryango ifunze cyangwa iri mu mirimo nsimburagifungo ifitiye igihugu akamaro (TIG) zo kutabwira abana babo ko abo bakurikiranywe barengana, mu nyigisho zo ku mashyiga babaha bakababwiza ukuri ko bari guhanirwa ibyo bakoze.

Ati “Aho twicaye iwacu hamwe turi ku mashyiga, bamwe bafite ababo bagifunze, bamwe bafite ababo muri TIG, mwirinde kubwira abana ko ba se barengana ahubwo mumubwire muti mwana iso yagize nabi, yishe Abatutsi nicyo kimubesheje hariya. Bizatuma ya “Ndi Umunyarwanda” yacu igera ku ntego”.

Nyirimbuga ni umwe mu bagize uruhare mu bwicanyi bwakorewe i Murambi mu murenge wa Gasaka mu karere ka Nyamagabe haguye Abatutsi bagera ku bihumbi 50, ahubakwaga ishuri ry’imyuga ubu hakaba harabaye urwibutso rwa Jenoside yakorewe Abatutsi rwa Murambi.

Nyirimbuga yakatiwe n’urukiko Gacaca igifungo cy’imyaka 7 n’amezi abiri kuko yari yaremeye icyaha akagabanyirizwa igihano ndetse ubu akaba yararangije igihano cye.

Ubu ni umuyobozi w’ishyirahamwe ry’ubumwe n’ubwiyunge rishingiye kuri komisiyo y’ubutabera n’amahoro mu Kiriziya Gaturika, rikorera muri santarari ya Bugarura mu murenge wa Kibilizi mu karere ka Nyamagabe, rikaba rigizwe n’abarokotse Jenoside 19 n’abemeye uruhare rwabo muri Jenoside batanu, mu gihe abandi batanu bari kumwe bagiye kurangiza TIG batari barakoze.

Emmanuel Nshimiyimana