Ibi byatangajwe na Kajangana Jean Aimé, umuyobozi ku rwego rw’umuvunyi ushinzwe gukurikirana abayobozi n’ishyirwa mu bikorwa ry’iri tegeko, ku wa mbere tariki ya 20 Mata 2015, ubwo bahuguraga abanyamategeko batandukanye bo mu Rwanda ku bijyanye n’iri tegeko ryo gusaba no gutanga amakuru.

Kajangana yatangaje ko ibirego 17 bakiriye basanze bikomoka cyane cyane mu bumenyi buke bw’iri tegeko, iyi ikaba impamvu nyamukuru ituma bongera amahugurwa ku bantu batandukanye kugira ngo rimenyekane, kandi rikoreshwe neza.

Yagize ati “Mu birego 17 twakiriye ku rwego rw’umuvunyi ibyiganjemo ni iby’abantu basabwaga amakuru bagatinda kuyatanga cyangwa se bakanabireka ntibayatange kubera ubumenyi buke babaga bafite kuri iri tegeko, tukabahwitura bakikosora kandi tukabakangurira gusubiramo neza iri tegeko kugira ngo batazongera guhura n’icyo kibazo”.

Kajangana kandi yanatangaje ko hari imbogamizi zakundaga kugaragara zijyanye n’impungenge abatanga amakuru bagiraga akenshi kubera kutizera abanyamakuru bayahaye, no gutinya ko amakuru batanze ashobora kubagiraho ingaruka bigatuma rimwe na rimwe hari amakuru adatangwa, ariko yerekana ko iri tegeko ribahumuriza kuko rigaragaza amakuru yemerewe gutangwa n’atabyemerewe ku buryo nta mpungenge zizongera kuvuga ku byo umuntu yatangaje.

Kajangana yanasabye abanyamakuru ko bagomba gukora kinyamwuga bakagarurira icyizere abatanga amakuru bakunze kuyimana bitwaza ko abanyamakuru babavugira ibyo batavuze, ndetse anagira inama abayobozi bakunze gutanga amakuru kujya bayatangira ku gihe batagoranye kugira ngo imikoranire y’inzego igende neza kandi n’abagenerwabikorwa aribo baturage babashe kugira uburenganzira kuri ayo makuru.

Roger Marc Rutindukanamurego