Uyu mwiherero ngarukamwaka uzahuza abayobozi bakuru b’igihugu bagera kuri 250 bahagarariye inzego zitandukanye za Leta, ibigo biyishamikiyeho, ibigo byigenga n’iby’ubucuruzi.

Aba bayobozi bazaganira ku ntego z’igihugu zigamije kugira u Rwanda igihugu gifite ubukungu bushingiye ku bumenyi ndetse no gusuzumira hamwe ibikwiriye gukorwa kugira ngo ingamba z’iterambere rusange zihutishwe.

Perezida wa Repubulika, Paul Kagame, ni we uzayobora uyu mwiherero anageze ku bazawitabira ijambo riwutangira ndetse n’iriwusoza.

Minisitiri w’Intebe na we azageza ku bitabiriye Umwiherero uko imyanzuro y’Umwiherero wa 2015 yashyizwe mu bikorwa.

Uyu mwiherero uzaganira ku ngingo nkuru zirimo ingamba mu kwihutisha ishyirwa mu bikorwa ry’Icyerekezo 2020, kongerera agaciro ibikomoka mu Rwanda no guteza imbere imibereho myiza n’uburenganzira bw’umwana w’Umunyarwanda.

Umwiherero ufite imizi mu Muco Nyarwanda wo hambere. Abayobozi b’igihugu barahuraga bakaganira ku bibazo byugarije abaturage. Intego yari ugushaka ibisubizo ku bibazo byagaragajwe no kwiyemeza kubishyira mu bikorwa.

Muri iki gihe, iki gikorwa cyaravuguruwe ku buryo abayobozi bakuru b’igihugu ari bo bawuhuriramo, bagashakarira hamwe imiti ku bibazo byugarije igihugu.

Muri uyu mwiherero, bazasuzuma niba ibyo bemereye abaturage byarakozwe kandi baganire kuri gahunda zikeneye kunozwa kugira ngo ibyo abaturage basezeranyijwe byose bishyirwe mu bikorwa.

Umwiherero nk’uyu ubaye ku nshuro ya 13. Uw’uyu umwaka ufite insanganyamatsiko igira iti “Iby’iwacu: Umusingi w’Iterambere”.