Nyuma y’igihe kirekire bakoresha amazi mabi bavomye muri Nyabarongo, mu migezi no mu binamba; abaturage bakoresheje amaboko yabo abandi batanga insimburamubyizi mu gucukura umuyoboro w’amazi uva ahitwa Kamuhanda werekeza mu Nyange ho mu Kagari ka Kagina.

Bahati Richard, Umukuru w’Umudugudu wa Kibaya, ahamya ko mu mudugudu bari bafite ikibazo cy’amazi ku buryo banze gutegereza ko ikigo cy’igihugu gishinzwe amazi, isuku n’isukura WASAC; cyibwiriza kuhageza umuyoboro w’amazi .

Ati “Twabonye ko dutegereje ko Leta itugezaho amazi byazatinda dukorana inama n’abaturage twiyemeza kwicukurira umuyoboro mu rwego rwo kugira ngo twereke ubuyobozi ko tuyakeneye cyane”.

Bamwe mu baturage bakoresha amazi badashye mu Kinamba cyitwa “Gasagure”, batangaza ko amazi yaho bayakoresha imirimo itandukanye nko gufura, guteka, rimwe na rimwe bakanayanywa. Ngo iyo bakenye amazi meza bayagura amafaranga y’u Rwanda 200 ku ijerekani n’abanyonzi bayagura kuri kaburimbo.

Bishimiye gutanga umusanzu mu gukora umuyoboro w’amazi kuko ngo mu mateka yabo batigeze bakoresha amazi meza.

Kankindi Consilie, ati “Uyu mucyamo uzengurutse igishanga cya Nyabarongo twese dukoresha amazi tuvoma mu binamba, ndetse hari n’abanywa amazi ya Nyabarongo. Nitubona amazi meza ntituzongera kurwaza inzoka.”

Nyuma y’uruhare rw’abaturage rwo gucukura umuyoboro w’amazi hifashishijwe umuganda n’insimburamubyizi z’abatarabonetse, WASAC izakurikizaho gushyiramo ibihombo by’amazi no kuyageza ku baturage bayakeneye.

Umunyamabanga Nshingabikorwa w’Umurenge wa Runda, Nyirandayisabye Christine, ashima uruhare n’ubushake abaturage bagaragaza mu kubaka ibikorwa by’inyungu rusange, kuko ari ikimenyetso cyo kwigira. Ati “Ibi bikorwa by’inyungu rusange bigira uruhare mu kongera ingengo y’imari y’igihugu.”

Marie Josee Uwiringira