Mu murenge wa Nyarubuye, abaturage barwanyije isuri bacukura imirwanyasuri kugira ngo bafate neza isoko ya Kamusare ivomwaho n’abatari bake muri uwo murenge.

Mu murenge wa Mushikiri, umuganda waranzwe n’igikorwa cyo kubaka ibyumba by’amashuri by’uburezi bw’ibanze bw’imyaka 12 kuri Groupe Scolaire ya Mushikiri iherereye mu kagari ka Rwayikona.

Muri gahunda yo gushimira abitabiriye neza umuganda mu mwaka 2011, umuyobozi w’akarere ka Kirehe, Murayire Protais, yashyikirije umuyobozi wa Njyanama y’umurenge wa Mushikiri igihembo cy’ibihumbi 300 n’igikombe cyavuye ku rwego rw’igihugu.

Icyo gihembo gitangwa hakurikijwe inyungu n’agaciro ibikorwa by’umuganda bifite, icyo cyakomotse kukuba Mushikiri ariyo yubatse SACCO mbere mu karere ka Kirehe.

Umuyobozi w’akarere yabashimiye imbaraga bakoresheje na byinshi bamaze kwigezaho biteza imbere, aboneraho kubasaba kwirinda gusubira inyuma kandi abasaba no kuvugurura urutoki no kwita ku isuku kuko ari umuco wabo kuva kera.

Murayire yabasabye kwirinda urugomo rwa hato na hato cyane cyane uruterwa na kanyanga ikunze kugaragara mu kagari ka Rwayikona bagakaza amarondo banatanga amakuru ku gihe.

Grégoire Kagenzi