Polisi ivuga ko Butera wiga muri Kaminuza ya Briar Cliff yarashwe ku kuboko ndetse no mu gatuza ahagana mu masaha ya saa saba n’iminota 12 z’ijoro mu nyubako ya Mac Behr’s.

Uwitwa Solomon Harris w’imyaka 24 ari mu maboko ya polisi ashinjwa ubu bugizi bwa nabi aho ngo yaba yarakomerekeje uyu munyeshuri yifashishije intwaro; nk’uko polisi yaho ikomeza ibivuga.

Polisi yo muri kariya gace ivuga ko Harris yashatse kurasa undi muntu bari barakaranyije mu nzu babyiniramo ariko aho kugira ngo isasu rifate uwo muntu rifata Butera. Yakomeretse ku mwijima no ku gihaha.

Polisi yagaragaje ko amasasu Butera yarashishijwe ari ayo mu mbunda ntoya yo mu bwoko bwa Pistoli 45-caliber. Nyuma yo kuraswa Butera yahise ajyanwa mu bitaro bya Mercy Medical Center mu mujyi wa Sioux.

Ubuyobozi bw’ikigo Butera yigamo bwababajwe n’iki kibazo uyu munyeshuri wabo yahuye nacyo ndetse ngo bugiye kugerageza kwita ku buzima bwa Butera no gushakisha uwakoze iki cyaha.

Ubuyobozi kandi bwemeza ko bukomeza gushyira hamwe n’abandi banyeshuri mu kwita kuri Butera ndetse n’umuryango we.

Ku cyumweru nibwo uyu Harris yagejejwe imbere y’urukiko kugira ngo yisobanure kubyo aregwa. Urukiko rwemeje ko uru rubanza ruzasubukurwa tariki 28/11/2012.

Uhagarariye u Rwanda muri Leta Zunze Ubumwe z’Amerika, Ambasaderi James Kimonyo, yatangaje ko bagiye kureba uko bafasha Butera n’umuryango we nk’abagize Diaspora nyarwanda muri kiriya gihugu.

Egide Kayiranga