Uwo musore w’itwa Uhawenayo Neophyte, ni umunyeshuri muri kaminuza yigenga ya Hope mu mujyi wa Bujumbura. Ku mugoroba wo ku wa 28 Nzeri, Polisi y’u Burundi yamusanze aho yari ari kwimenyereza umwuga mu bitaro bya Kibuye biherereye mu Ntara ya Gitega, ihita imwambura ibye iramujyana.

Umubyeyi w’uwo musore, Pasitoro Kanyabashi Thomas wo mu murenge wa Bweyeye mu Karere ka Rusizi, avuga ko bamenye amakuru y’umwana wabo bahamagawe n’Abarundi bigana, babamenyesha ko yafunzwe ndetse Polisi ikajyana mudasobwa na telefoni bye nyuma yo gusaka inzu yari acumbitsemo.

Kanyabashi agira ati “Amakuru dufite ni uko uwo mwana afungiye kuri police ya Gitega ashijwa kuba umutasi w’u Rwanda kandi akaba afunzwe nabi kuko afungiye ahantu ha wenyine, ibyo bamushinja ntabyo akora kuko yari amaze imyaka itanu yiga i Burundi”.

Uyu mubyeyi akomeza avuga ko bakimara kumenya ko Uhawenayo yafunzwe, bahise babimenyesha inzego zishinzwe umutekano mu Rwanda babizeza ko bagiye kubikurikirana.

Umuryango w’uyu musore usaba Leta y’u Burundi kumurekura ndetse bagasaba na Leta y’u Rwanda kugira icyo ikora ngo umwana wabo arenganurwe kuko ibyo bamushinja ntabihari dore ko yari afite ibyangombwa.

Umunyamabanga Nshingwabikorwa w’Umurenge wa Bweyeye, Muhirwa Philippe avuga ko bakimara kumenya ayo makuru, bayatanze mu inzego zitandukanye zaba iz’u Rwanda na Ambasade kugira ngo uwo musore arenganurwe dore ko yari umunyeshuri.

Umuvugizi wa Polisi y’u Rwanda mu ntara y’Uburengerazuba, ku murongo wa telefoni yabwiye Kigali Today ko ataratohoza ayo makuru neza, yongeraho aza kuyakurikirana akamenya ibyayo neza.

Leta y’u Rwanda yakomeje kwamagana itabwa muri yombi ry’Abanyarwanda muri iki gihugu cy’u Burundi, cyane cyane muri iki gihe cy’umutekano muke n’imvururu byakuruwe na manda ya gatatu ya perezida Pierre Nkurunziza.

Musabwa Euphrem