Umubano w’Akarere ka Kamonyi na Komini Wolwe St Pierre ngo wagize uruhare mu kugera ku iterambere

21-05-2015 - 09:36' | Ibitekerezo ( 2 )

Ubuyobozi bw’Akarere ka Kamonyi n’ubwa Komini Wolwe St Pierre yo mu gihugu cy’u Bubiligi burishimira ko umubano bafitanye wagize uruhare mu iterambere ry’abatuye Akarere ka Kamonyi.

Ubwo bizihizaga isabukuru y’imyaka 45 ishize Akarere ka Kamonyi gafitanye umubano na Komini Wolwe St Pierre, ku wa 20 Gicurasi 2015, hashimwe ibikorwa by’iterambere mu burezi, mu buzima, mu buhinzi no mu bikorwaremezo byagezweho muri Kamonyi babikesheje uwo mubano.

Iyi sabukuru yizihirijwe mu Murenge wa Musambira hanatahwa ishuri ry’inshuke ryubatswe na Rotary Club de Bruxelles mu Bubiligi, ryubakwa ku ishuri ribanza ryitiriwe Jean Depaepe naryo ryubatswe ku nkunga ya Komini ya Wolwe Saint Pierre.

Bakase gato bizihiza isabukuru y'imyaka 45 y'umubano hagati y'Akarere ka Kamonyi na Komini ya Wolwe St Pierre.

Uretse ibi bikorwa, Komini ya Wolwe St Pierre yafashije abaturage b’Akarere ka Kamonyi kugera ku mazi meza, ibaha amahugurwa ku buhinzi n’ubworozi mu cyo bise Projet, yubaka ibigo nderabuzima bya Musambira, Mugina na Nyagihamba, ndetse ibaha n’ibikoresho byo mu biro by’Umurenge wa Musambira.

Abanyamusambira batangaza ko Wolwe St Pierre yabafashije kwiga hafi no kwivuza hafi. By’umwihariko bagashima umushinga wo kwigisha abantu bakuze muri gahunda ya “catch up”, kuko yafashije abana bari barataye ishuri gusubira kwiga.

Umubano wa Komini ya Wolwe St Pierre n’iyahoze ari Komini Musambira watangiye mu mwaka wa 1970, utangizwa n’abahoze ari abayobozi b’ayo makomini yombi ari bo François Pinços ku ruhande rwa Wolwe St Pierre na Simbizi Gabriel wari Burugumesitiri wa Komini Musambira.

Jean Depaepe (wambaye ikote ry'umuhondo) na Burugumesitiri wa Wolwe St Pierre, Salax Benoit bifatanyije n'abanyakamonyi.

Burugumesitiri wa Komini ya Wolwe St Pierre, Salax Benoit waje ayoboye intumwa z’Ababiligi zaje kwizihiza isabukuru, arashima abayobozi batangije umubano ukava ku bantu babiri ukagera ku rwego rw’ibihugu; kandi agashima n’abaturage b’Akarere ka Kamonyi kuko babungabunga imishinga Komini ye ibafasha kugeraho.

Umuyobozi w’Akarere ka Kamonyi, Rutsinga Jacques, ahamya ko inkunga zatanzwe n’inshuti z’Ababiligi zaje zunganira gahunda ya Leta, akaba ariyo mpamvu abaturage bagombaga kuzishyigikira kuko aribo ziteza imbere.

Mu mubano hagati y’ibihugu, ababana bashingira ku bucuti atari uguhana inkunga, ahubwo ngo baba bagamije gusabana no kungurana iitekerezo.

Niyigena Eugène, umuhuzabikorwa w’ishyirahamwe ry’iterambere ry’umubano w’ibihugu n’ubucuti mu baturage (APROJUMAP), atangaza ko n’ubwo ibihugu bifitanye umubano n’u Rwanda nta nkunga bihakura, bashima ubusabane buranga abanyarwanda.