Uwo muyobozi avuga ko hari abagore batasobanukiwe neza na gahunda y’uburinganire bumvise nabi uburinganire bakabufata uko butari, ku buryo bishyira ingo nyinshi mu bibazo.

Ati “Gahunda y’uburinganire ni gahunda nziza kuko yasubije abagore uburenganzira bari barambuwe, ariko uburinganire ntibusobanura guhangana hagati y’umugabo n’umugore, bisobanura kureshya imbere y’amategeko”.

Mu myaka yashize abagore ni bo bagaragazaga cyane ikibazo cy’ihohoterwa bakorerwa n’abagabo ariko ubu bisa n’aho byahindutse kuko hari abagabo bavuga ko bahohoterwa n’abagore ba bo, kandi bakabikora bitwaje uburinganire nk’uko umwe mu bagabo twavuganye wo mu mujyi wa Kayonza yabidutangarije.

Uwo mugabo utashatse ko amazina ye atangazwa yagize ati “Ubuse hari umugabo ukigira ijambo mu rugo? Ugira ngo uravuze umugore akaba arakugurukanye ako kanya akaba ahamagaye polisi ngo uramuhohoteye kandi bahita bagufunga da! Ntawavuga nabi umugore muri iki gihe kereka ashaka gufungwa”.

Umuyobozi w’akarere ka Kayonza wungirije ushinzwe imibereho myiza y’abaturage avuga ko abagore badakwiye gusuzugura abagabo ba bo bitwaje uburinganire.

Yavuze ko uburinganire n’ubwuzuzane bidakuraho inshingano buri wese aba afite mu rugo kuko ubwuzuzanye bisobanura gushyira hamwe mu gufata ibyemezo bireba umuryango wose.

Abagore ngo bakwiye kubaha abagabo ba bo, kandi abagabo na bo bagakunda abagore babo, hanyuma bagahuriza hamwe ku ifatwa ry’ibyemezo bireba umuryango muri rusange.

Icyo gihe nibwo uburinganire n’ubwuzuzanye bizashoboka nk’uko umuyobozi w’akarere ka Kayonza wungirije ushinzwe imibereho myiza y’abaturage abyemeza.

Cyprien M. Ngendahimana