Icyegeranyo cyitwa Human Rights and Democracy : 2011 foreign & commonwealth office report kivuga ko nubwo kimwe cya kabiri cy’Abanyarwanda bakiri mu bukene, ibijyanye na demukarasi, imiyoborere myiza n’uburenganzira bwa muntu u Rwanda rugenda rutera intambwe nziza akaba ari nayo mpamvu u Bwongereza bukomeje kongera inkunga bugenera u Rwanda.

Ubwo akanama k’umuryango w’abibumbye gashinzwe uburenganzira bwa muntu kasuzumaga amategeko ajyanye n’uburenganzira bwa muntu mu Rwanda, u Rwanda rwemeye gushyira mu bikorwa imyanzuro 67 kuri 73 yari yatanzwe.

Bimwe mu by’ingenzi u Rwanda rwatangiye gushyira mu bikorwa ni ubwisanzure bw’amashyirahamwe; u Rwanda rworohereza amasosiyasiyo mu kuyaha ubuzima gatozi, kwakira neza imiryango itegamiye kuri Leta no kwemera ubwisanzure bw’amadini n’imikorere yayo.

Mu Rwanda kandi harimo gukorwa ivugurura rizatuma ibijyanye n’amashyirahamwe, imiryango itegamiye kuri Leta hamwe n’amadini bizava muri minisiteri y’ubutegetsi bw ‘igihugu bigashyirwa mu kigo cyigenga gishinzwe imiyoborere (Rwanda Governance Board), bikazatuma bizajya bikurikiranwa neza ndetse na serivisi byakenera zikaboneka byihuse.

Indi ngingo igaragaza ko u Rwanda rurimo gutera intambwe ishimishije ni uko ubwisanzure bw’itangazamakuru nabwo butasigaye inyuma. Icyi cyegeranyo kivuga ko kuba hagiye kujyaho urwego rwo kwiganzura (auto-regulation) mu itangazamakuru ari intambwe ishimishije kuko abanyamakuru bazajya babasha kwigenzura no gucyahana Leta itarinze kuza kubyivangamo.

U Bwongereza kandi bwishimira ko u Rwanda rwakuyeho igihano cy’urupfu.

Bimwe mu byo u Rwanda rukinengwa harimo itegeko ry’ingengabitekerezo ya Jenoside, u Bwongereza buvuga ko rikoreshwa cyane mu manza z’abanyamakuru n’abanyapolitike ndetse n’umutekano w’abatavuga rumwe na Leta baba hanze y’igihugu.

Icyi cyegeranyo cy’umwaka wa 2011-2012 kigizwe na paji 392 gikorwa n’igihugu cy’u Bwongereza buri mwaka, aho kivuga ku burenganzira bwa muntu mu bihugu bigize umuryango wa Commonwealth.

Anne Marie Niwemwiza