Bimwe mu bigo by’ubucuruzi Super Décor ivuga ko yaguragamo(irangura) ibicuruzwa bitandukanye, ni ZAMKO Rwanda Ltd na SOCODIP; ariko Ikigo cy’u Rwanda cy’Imisoro n’Amahoro(RRA) ngo cyarebye inimero za TIN zabyo Super Décor yabahaye gisanga zitabaho, nk’uko byatangajwe n’abakozi b’ishami rya Polisi rikorana na RRA(DPD).

Nyir’ikigo Super Décor, Straton Mvukiyehe, yafashwe nyuma yo kugaragariza RRA ko agomba kwishyurwa umusoro wa TVA ungana na miliyari 1.4 FRW; bikaba bitaramuhiriye kuko RRA na yo yahise itangira iperereza isanga yarahimbye inyemezabuguzi.

Ubu Mvukiyehe ni we uzishyuzwa ayo mafaranga yanyereje, ariko kandi ngo naramuka ahamwe n’ibyaha byo gukoresha inyandikompimbano, akazahanishwa igifungo kuva ku myaka itatu kugera kuri itanu, n’ihazabu y’amafaranga y’u Rwanda kuva ku bihumbi 300 Rwf kugera kuri miliyoni eshatu, nk’uko Umuvugizi wa Polisi mu Mujyi wa Kigali, Spt Modeste Mbabazi yabisobanuye.

Andi makosa Polisi ivuga ko itarabonera icyaha gihama Mvukiyehe, ni uko ikigo cye yacyanditse ku bantu bo mu muryango we, barimo nyina wabo witwa Mukandamage Alfonsine ukibereye Perezida, akaba ngo afatanije na Tumuteye Narcisse; naho Mvukiyehe we akaba akireberera nk’uko abyiyemerera.

Mukandamage ariko we avuga ko ntaho ahuriye n’icyo kigo kandi ko atanakizi. Agira ati "Nyamara ndi umuturage wo mu Karere ka Rulindo w’umuhinzi, ndi umukene wo mu cyiciro cya mbere cy’ubudehe, ntabwo nzi amazina y’icyo kigo mbereye umuyobozi, mperuka kumva bakivuga mu mwaka wa 2009 ubwo cyashingwaga; nta faranga na rimwe nigeze nakira rivuye muri icyo kigo.”

Super Décor kandi yateye Polisi kuyibazaho, kuko ngo ikora ubucuruzi bw’ibintu bitandukanye bigera ku 19 bidafitanye isano n’imwe, birimo ibikomoka ku bucukuzi bw’amabuye y’agaciro, resitora, ibikoresho by’ubwubatsi, ibikomoka kuri peterori, ibitabo n’ibinyamakuru, ibikoresho by’amashanyarazi, ibijyanye n’ubuhinzi n’ubworozi, imodoka, imitako ndetse no gukora ubukanishi.

Simon Kamuzinzi