Abakozi ba Simba Supermarket bihutiye guhagarika amashanyarazi ajya muri iryo guriro, ndetse Polisi ihita izana kizimyamoto (imodoka yo kuzimya), inkongi itarafata inzu yose n’ibicuruzwa biyirimo; nk’uko Charles Gasana, umwe mu bafatanyabikorwa ba Simba yasobanuye.

Gasana yavuze ko ibyahiye byose bitaramenyekana agaciro kabyo, ndetse ko adashobora kugena igihombo kiri buterwe no kudakora, kuko barimo gukuraho umwanda watewe n’ibyangiritse hamwe n’umwotsi cyangwa umuyonga wahindanije byinshi mu bicuruzwa by’iryo guriro.

Yongeraho ko hakiri amaperereza ku cyatumye umuriro waduka mu byuma bikonjesha no mu ntsinga zijya muri tereziviziyo (screens) zicunga umutekano, ariko ko mbere yaho amashanyarazi yabanje kujya abura yongera agaruka.

Kuri uyu wa gatatu wose Simba Supermarket ntabwo ifungura imiryango, ariko ngo hari icyizere ko bazafungura imiryango bakongera gucuruza guhera ku wa kane tariki 21/3/2013, nk’uko uwo mufatanyabikorwa yatangarije Kigali today.

Inkongi z’imiriro zireze muri iki gihe, kuko Simba Supermarket ihiye nyuma y’izindi nyubako zirimo ikigo cya Saint Paul cyakoreragamo Radio Isango Star, inzu yaberagamo imyidagaduro ya Cadillac na Orion Club i Muhanga.

Hahiye kandi utubari twa Down Town na La Classe, urusengero rwa ADEPR ku Kinamba mu mujyi wa Kigali, ndetse n’iduka ry’uwitwa Kuradusenge Emmanuel riherereye i Nyarutarama, byose bikaba byarahiye mu mwaka ushize wa 2012.

Simon Kamuzinzi