Shingiro: Nta muntu ugikata icyondo yambaye ibirenge

19-11-2012 - 07:54' | Ibitekerezo ( 3 )

Abaturage batuye umurenge wa Shingiro, akarere ka Musanze baravuga ko bataye umuco wo gukata icyondo bambaye ibirenge, kubera ko bamenye ko bashobora kwanduriramo indwara nyinshi zituruka ku mwanda.

Bamwe mu batuye uwo murenge bavuga ko mbere yo kujya gukata icyondo, bagomba kwambara bote, bitewe n’uko batandukanye n’ubujiji, bakamenya ububi bwo kwishora mu cyondo n’ibirenge bisa.

Nkezabera Damien, yagize ati “Kera ntabwo nabashaga kuba nabona n’amafaranga yo kubonera abana ibyo kurya, ariko ubu twateye imbere, tubasha kwihaza mu biribwa maze nkibuka kugura bote”.

Bamenyeko gukata icyondo n'ibirenge bisa bishobora kubatera indwara ziterwa n'umwanda.

Iyakaremye Aimable, umunyamabanga nshingwabikorwa w’umurenge wa Shingiro, avuga ko mu murenge ayobora nta muturage n’umwe utambara inkweto, akongeraho ko kugeza ubu nta gikorwa cy’ubukangurambaga kigikorwa kuko byamaze kuba umuco mu baturage.

Agira ati: “Hashize imyaka myinshi abaturage bakanguriwe ibyiza byo kwambara inkweto, kuburyo kuri ubu nakubwira ko 100% by’abaturage bacu bose bambara inkweto”.

Umurenge wa Shingiro, ni umwe mu mirenge y’icyaro cyane mu karere ka Musanze, ukora ku birunga, ukaba uzwiho kugira ubutaka bwera cyane igihingwa cy’ibirayi.

Jean Noel Mugabo