Byavugiwe mu kiganiro aba bashoramari bashya bagiranye n’abanyamakuru kuri uwu wa 21 Mutarama 2016, ubwo bashyiraga ku mugaragaro iri zina rishya ndetse banasobanura impamvu y’izi mpinduka.

Abayobozi ba SAHAM Assurance bavuga ko ije kongera imbaraga mu bwishingizi.

Umuyobozi Mukuru wa SAHAM Assurance, Patrick Nouh, avuga ko baje gukorera mu Rwanda kuko ari igihugu gifite amahoro kandi cyorohereza abashoramari.

Avuga ku byo CORAR AG yari isanzwe ikora mu bwishingizi, yagizi ati “Servisi zose bahaga abaturage tuzazikomeza ndetse twongeremo n’ibindi bishya mu rwego rwo kunoza imikorere no kwerekana ubudasa n’izindi sosiyete cyane ko dufite ubunararibonye muri aka kazi dusanzwe dukorera mu bihugu 29”.

Akomeza avuga ko mu bishya bazazana harimo nko gufasha gukurikirana ibijyanye n’imodoka yafashe ubwishingizi muri SAHAM Assurance mu gihe yagize impanuka, kuva aho iyo mpanuka yabereye, kwa muganga ndetse no gukurikirana ibijyanye n’ubwishyu kugira ngo hatabaho kurangarana umukiriya wabo.

Umuyobozi w’Ishami ry’Ubuzima muri SAHAM Assurance, Bahenda Joseph, we yagarutse ku bwishingizi bw’inkongi z’umuriro ziba hato na hato.

Agira ati “Abanyarwanda ntibitabira gufata ubwishingizi bw’inzu zabo, n’ababikora akenshi ni abafite imiturirwa ariko ntibamenye ko n’inzu umuntu atuyemo yakagombye kujya mu bwishingizi kuko iyo ihiye ahangayika kurusha uko yakwishyura amafaranga makeya, yagira ibyo byago tukamusubiza inzu ye uko yari imeze”.

Abanyamakuru basobanurirwa imikorere ya SAHAM Assurance.

Yongeraho ko bagiye kwibanda ku bukangurambaga bwo kumenyekanisha ibyo bakora ndetse no gukangurira abaturage gufata ubwishingizi bw’ubuzima bwabo n’ubw’ibyabo.

SAHAM Assurance ni ikigo kizobereye mu by’ubwishingizi, gikorera mu bihugu 29 kikagira imari irenga miliyari imwe y’Amadorari y’Amerika.

Ifashe igice kinini cy’imigabane ya CORAR AG, mu gihe ubusanzwe hafi 100% by’imigabane y’iyi sosiyete yari iya Kiliziya Gatolika.

MENYA UMWANDITSI

Jean Claude Munyantore

Umunyamakuru

@ MunyantoreC

Reba inkuru zose nanditse ( 2072 )