Iki gitebo gifasha umugore kubikamo amafunguro yateguriye umugabo we maze akaza gufungura ibiryo bishyushye bimeze neza kuko kibika ubushyuhe hagati y’amasaha 8 n’amasaha 10.

Ibi ngo bivuze ko ushobora gusiga utetse mu gitondo ukabikamo amafunguro yawe wataha nimugoroba ugasanga agishyushye; nk’uko bitangazwa na Mukandori Marie Louise.

Iki gitebo rero ngo cyakemuye amakimbirane yaturukaga mu kuba umugabo atashye agasanga batinze gutunganya amafunguro ndetse yateka kare umugabo agasanga byahoze.

Mukandori avuga ko igitebo bise “umuhuza” kibafasha cyane kuko nyuma yo kubumbirwa muri koperative ABADAHIGWA KU MURIMO ikorera mu kagari ka Kigabiro bamaze gutera imbere babikesha amafaranga bavana mu bitebo bishyushya amafunguro baboha.

Ibi bitebo usibye kuba babigurisha bakavanamo amafaranga yo kwikenuza byatumye babona umwanya wo kwikorera indi mirimo kandi nabyo barabigurisha bakabikuramo amafaranga abafasha mu buzima bwabo bwa buri munsi.

Igitebo kimwe bakigurisha amafaranga ibihumbi 10; bikaba byaratumye nta mugore ugitega amaboko ku mugabo we kuri buri kintu.

Mujawamariya Nadine umukozi wa World Vision niwe wahuguriye abo bagore kuboha ibi bitebo; atangaza ko batekereje kuri iyi gahunda mu rwego rwo kubafasha kubona umwanya uhagije wo gukora indi mirimo.

Abagabo nabo bishimira ko igitebo bise “umuhuza” cyatumye ingo zabo zizamuka kandi birinda abagore babo gutakaza umwanya munini mu mirimo yo guteka, kuko icyo gitebo kibafasha kubika ibiryo mu buryo bubafasha ndetse bakabikuramo n’agafaranga.

Ngarukiye Damascene ati “umugore wanjye se ugirango aracyansaba amafaranga? Nsanga byinshi yabikemuye da nawe se ko ibintu byose byandebaga nk’umugabo mu rugo ariko ubu mbona asigaye andusha kwinjiriza urugo kandi mbona ari byiza bituma umwe atarambirwa undi”.

Ernestine Musanabera