Nyuma yo guhabwa ayo mabati, abo baturage basabwe guhera kuri iyo nkunga bishakamo ibisubizo ku bindi bibazo batewe n’ibyo biza, bakumva ko baharanira kwigira aho kumva ko hari indi nkunga bazategereza hanze.

Ntawukiruwabo w’imyaka 79 y’amavuko, umwe mu bahawe aya mabati yagaragaje ibyishimo byinshi amaze kuyahabwa kuko ngo kuva yahura n’ibi biza ubuzima bwe n’umuryango we kwari ugusembera mu baturanyi ariko ubu ngo na we agiye kubona aho arambika umusaya nk’abandi Banyarwanda, akaba yashimiye Caritas ya Diyoseze Gatulika ya Cyangugu uko ikomeje kubitaho.

Padiri Niragire Valens, umuyobozi wa Caritas ya Diyoseze Gatulika ya Cyangugu wanashyikirije aya mabati aba baturage, yavuze ko bitarangiriye aha, ko ahubwo Caritas ya Diyoseze gatulika ya Cyangugu izakomeza gushakisha aho yakura ubundi bufasha kuko iyi nkunga yatanzwe itabashije kugera ku bayikeneye bose.

Uretse abaturage b’iyi mirenge, haracyagaragara n’abandi baturage mu yindi mirenge itandukanye y’akarere ka Rusizi bagiye bahura n’ibiza nk’ibi na bo bakaba bakeneye gutabarwa icyakora akarere ka Rusizi kakavuga ko kagishakisha hirya no hino uko na bo babona aho barara bakabaho batekanye nk’abandi baturage.

Tariki ya 20 Ukwakira 2013 ni bwo umurenge wa Nkanka kimwe n’indi mirenge ya Gihundwe na Giheke iwukikije, yose yo mu karere ka Rusizi yibasiwe bikomeye n’ibiza by’imvura nyinshi cyane ivanze n’urubura, amazu atari make kimwe n’imyaka yo mu mirima bikangirika bikomeye, abaturage batari bake bagasigara iheruheru.

Musabwa Euphrem