Iyi ntumwa ya rubanda yavuze ko bigoye kugira icyo avuga ku rupfu rw’uyu mu Padiri kuko ngo yari umuntu w’inyangamugayo kandi wakoranye na Leta neza, yavuze ko batazigera bemerera na rimwe uwo ari we wese uzashaka gusenya u Rwanda yitwaje icyo ari cyo cyangwa uwo ari we akaba ari nayo mpamvu yasabye abantu kutavuga byinshi bakizera ubutabera.

Depite Jeanne d’Arc Nyinawase asaba Abanyarwanda guhanga amaso ubutabera ku rupfu rwa Padiri Nambaje.

Padiri Rwakabayiza Dieudonne yavuze ko Nyakwigendera yari umuntu witanga cyane aho yatangaje ko yakunze gukurikirana ibikorwa by’iterambere by’umwihariko umushinga wo gukurikirana inyubako z’umushinga wa hoteli Kiliziya Gaturika yatangije mu karere ka Rusizi aho diyosezi yari yaramweguriye icyo gikorwa.

Padiri Rwakabayiza yavuze ko atashidikanya ko bitewe n’ibibazo byagiye bivuka muri uyu mushinga byagiye bikururira nyakwigendera kutumva kimwe n’abandi uko icyo gikorwa kubera umuhate yagiraga.

Abapadiri n’abakirisitu bari gusezera kuri Padiri Nambaje.

Aha Padiri Rwakabayiza yavuze ko nyakwigendera yakunze kubwira bagenzi be aho igikorwa bari bamushinze kigeze aho ngo yavugaga ibintu byinshi birimo ibimunaniza bikubiyemo abantu n’ibintu ko ngo byagize ingaruka nyinshi zishobora kuba zirimo n’intandaro y’urupfu rwe.

Padiri Rwakabayiza yabwiye abitabiriye umuhango wo gushyingura Padiri Nambaje Evariste kuri uyu wa mbere tariki 24/02/2014 ko abasazi bibwira ko ubugizi bwa nabi aribwo buzana amahoro asaba abakiritu gusabira abamwivuganye kugira ngo bihane.

Padiri Rwakabayiza Dieudonne avuga iby’urupfu rwa mugenzi we Nambaje.

Musenyeri Thaddee Ntihinyurwa uyobora Diyosezi ya Kigali akanayobora inama y’abepesikopi Gatolika bo mu Rwanda yihanganganishije Musenyeri Bimenyimana umushumba wa diyosezi Gatolika ya Cyangugu wabuze umusasaridoti we.

Ku bw’umwihariko yasabye ubuyobozi bwite bwa Leta kuzagaragaza ukuri kuri uru rupfu avuga ko yizeye ko bazumva inkuru nziza ivuga abamwivuganye ibyo ngo ntabwo bizanezeza kiliziya Gatulika n’abayoboke bayo gusa ngo bizatuma ubutabera buhabwa icyubahiro ibyo kandi bikaba ari ukubaka ubutabera bw’ukuri.

Musenyeri Thaddee Ntihinyurwa uyobora inama y’abepesikopi Gatolika bo mu Rwanda asaba ubuyobozi bwa Leta kuzagaragaza iby’urupfu rwa Padiri Nambaje.

Umushumba wa Diyosezi Gatolika ya Cyangugu we yavuze ko Nyakwigendera yazize abagizi ba nabi uvuga ko bifuza kumenya abamwishe abo aribo n’icyo bamuzijije asaba inzego zibishinzwe kandi zibifitiye ubushobozi kuzabibafashamo.

Yasabye abakirisitu muri rusange gukomeza gusabira aba bagizi ba nabi bahitanye uyu mu padiri kugira ngo basabe Imana imbabazi.
Umurambo wa Padiri Nambaje Evariste wabonetse tariki 22/02/2014 mu modoka ye ifunze iparitse ku muhanda mu ishyamba rya Nyungwe.

Imbaga nyamwinshi yitabiriye umuhango wo gushyingura padiri Nambaje.

Ahagana saa yine za mu gitondo umushoferi wahoze akora muri Diyosezi Gatolika ya Cyangugu yatambutse ku modoka ya Padiri Nambaje ajya i Kigali yibwira ko yaba aparitse, uyu mushoferi yatunguwe no kubona iyo modoka igiparitse ubwo yavaga mu rugendo rwe i Kigali kubera ko yari asanzwe azi iyo modoka agira amatsiko yo kureba impamvu imaze iminsi iparitse aho mu ishyamba rya Nyungwe.

Ubwo yayirebagamo yasanze iyo modoka ikinze imiryango yose ariko arungurutsemo abonamo umuntu utagifite ubuzima, yahise yihutira kubimenyesha abapadiri bahita bajya kureba uko byaba byifashe bari kumwe n’inzego z’ubuyobozi bw’akarere ndetse n’izumutekano , bakihagera basanze Padiri Nambaje Evariste yitabye Imana.

Abayobozi mu nzego za Leta n’abaturage benshi bitabiriye umuhango wo gushyingura Padiri Nambaje.

Nyakwigendera yahoze akora akazi ko gucunga umutungo wa Diyosezi ya Cyangugu ariko ubu ntiyari agikora uwo murimo kuko yari asigaye ashinzwe ibijyanye n’imirimo yo kubaka Hoteri y’inyenyeri 5 ya kiliziya Gaturika iri kubakwa mu karere ka Rusizi.

Padiri Nambaje yabonetse muri iyi modoka ye iparitse muri Nyungwe yitabye Imana.

Musabwa Euphrem