Iyi gahunda ihuriweho n’abagore bakora ubucuruzi buciriritse bwambukiranya imipaka yatangijwe n’amadiyosezi 4 y’idini Gatolika ariyo Diyosezi ya Bujumbura mu Burundi, Cyangugu yo mu Rwanda na Diyosezi za Bukavu na Uvira zo muri Congo Kinshasa.

Iyi gahunda yibanda ku bintu bitandukanye kandi bihuriweho n’ibi bihugu bitatu birimo ivangura n’urwikekwe karande bishingiye kubihuha n’ibinyoma, ubushobozi budahagije bw’umugore n’inshingano ziremereye afite mu muryango, kudaha ubushobozi n’agaciro abagore bakora ubucuruzi bwambukiranya imipaka n’ubufatanye budahagije hagati y’abagore bakora ubwo bucuruzi.

Aba bagore batangaza ko intego y’uyu mushinga w’ubucuruzi bwabo witwa COSOPAX-RGL , ari ukugirango abagore bakora ubu bucuruzi bwambukiranya imipaka bagire uruhare rwabo mu kugarura imibanire myiza mu baturage baturiye imipaka muri aka karere k’ibiyaga bigari.

Ibi ngo bizagabanya umwuka mubi w’ivangura moko n’amakimbirane mu baturiye imipaka bo mu Burundi , Uburasirazuba bwa Congo n’u Rwanda.

Musenyeri wa Diyosezi Gatolika ya Cyangugu, Bimenyimana Jean Damascene, na Padiri Niragire Valens umuyobozi wa komisiyo y’ubutabera n’amahoro muri iyo Diyosezi bashimye byimazeyo iyi gahunda aho bavuga ko ari nk’ikiraro abantu bambukiraho bashaka amahoro bamaze igihe yarabuze aha bavuze ko bazakomeza gukurikirana iki gikorwa kugirango kizagere ku ntego y’amahoro koko.

Aba bagore mu ibyifuzo byabo bavuga ko kugirango uyu mushinga wa COSOPAX-RGL uzagere ku ntego zawo ngo bisaba ubwitange n’ubufatanye bw’abagore bagize iri tsinda bagakurikiranywa bya hafi n’abashumba ba za Diyosezi uko ari 4 Bujumbura, Bukavu, Uvira na Cyangugu.

Ubwo uyu mushinga uzamara imyaka ibiri watangizwaga ku mugaragaro bwa mbere byabereye muri Diyosezi Gatolika ya Bujumbura muri 2013, ubu bikaba byabereye muri Diyosezi ya Cyangugu biteganyijwe ko ubutaha bizabera muri Congo.

Musabwa Euphrem