Umushinga wa Handicap International wo gukumira ihohoterwa rishingiye ku gitsina no kubungabunga ubuzima bwo mu mutwe wasoze ibikorwa byawo kuri uyu wa Kane tariki 11/09/2014 mu Karere ka Rulindo, ngo wahinduye imyumvire n’imyitwarire ya bamwe mu bagabo babahohoteraga abagore babo bitanga amahoro mu ngo zabo.

Nyiransababera Hilarie, umubyeyi utuye mu Kagali ka Nyirangarama, Umurenge wa Bushoki yemeza ko mu rugo nta mahoro yari ahari kubera umugabo n’abana none ashima ko inyigisho za Handicap zatumye amahoro n’umunezero bisagamba mu rugo rwabo.

Agira ati: “Handicap njye ndayishimira ibyiza yankoreye mu rugo kuko sinari umuntu ufite amahoro ku mutima ndetse utari ufite amahoro mu bana ariko Handicap yaradusuye mu rugo itubwira ukuntu tugomba kwifata, ukuntu tugomba gufata abana bacu maze tugendera kuri uwo murongo”.

Haragimana Faustin yari umugabo wahozaga ku nkeke umugore, ikigeretseho yiberaga ku kabari ntagire icyo afasha urugo rwe, ariko ngo yaje guhindurwa n’inyigisho yahawe na Handicap Interanational hamwe n’abandi bagabo bahindutse bashinga itsinda ryitwa “Abivuguruye” rifasha kwigisha indi miryango ikibanye nabi kandi birimo gutanga umusaruro.

Nk’uko byagaragajwe na Karangwa Charles wari ukuriye uyu mushinga, ngo umushinga washyizeho abahuza (mediateurs) batanze umusanzu wabo mu kubaka imiryango n’igihugu muri rusange babagira inama, yongeraho ko bafashije abantu batishoboye kwifasha aho bishyiriyeho amatsinda 219 yo kwiteza imbere n’abantu 617 bitandukanyije n’ibiyobwabwenge.

Uyu mushinga watangiye muri 2011, usoje utwaye akayabo ka miliyoni hafi 80 yatanzwe na Confederation Suisse, ukaba wakoreraga mu Mirenge 12 yo mu turere twa Rwamagana, Rutsiro, Rubavu, Gasabo ndetse na Rulindo.

Nshimiyimana Leonard