Ndakaza w’imyaka 40, wari mu karere ka Ruhango yaje gukurikirana amahugurwa y’abarimu bazakora ibarura ry’abaturage, yari yahembwe ibihumbi 40 harimo ayo yakuye mu mahugurwa n’umushahara we.

Uyu mugabo ukomoka mu karere ka Bugesera, avuga ko yari arimo areba abamansuzi nyuma aza gukubwa ajya gushaka aho yihagarika. Akivayo yahise acakirwa n’abantu bamucucura udufaranga twose yari afite, aratabaza ariko abura umuntu umutabara.

Mu rwego rwo kwirwanaho, Ndakaza yahise agenda azimya ibyuma bitanga umuziki, avuga ko bongera kubicana ari uko babanje kumukemurira ikibazo.

Banyiri Ikimansuro babonye ko uyu mugabo arimo guteza umutekano muke, inzego z’umutekano zahise ziza kumuta muri yombi, ubu afangiye kuri station ya Polisi ya Nyamagana mu karere ka Ruhango.

Uyu mumansuzi tariki ya 28/07/2012 yaraye kuri Polisi ya Nyamagana akekwaho kwiba umuntu, bimenyekana arimo kurwanira amafaranaga n’umuhungu wari wamukuye i Kigali.

Si ubwa mbere muri iki Kimansuro kimaze iminsi mike gitangiye havuzwe ubujura, kuko no cyumweru gishize hari Abamansuzi babiri batawe muri yombi barimo kurwanira amafaranga akabakaba ibihumbi 50, umwe muri bo yari amaze kwiba umuntu wari waje kwihera amaso.

Ibi bibaye nyuma y’igihe gito abagore bo mu mujyi wa Ruhango, bagaragaje impungenge baterwa n’iki Kimansuro kiba kabiri mu cyumweru kwa Gatanu no kwa Gatandatu, kibera muri hotel Umuco.

Ikimansuro ni imbyino zibyinirwa mu kabari, aho abakobwa babyinisha igice cyo hasi mu ndirimbo mu buryo bukurura abagabo (Sexy Dance).

Eric Muvara