Umuhanda Ruhango-Kinazi-n’agace ka Mukunguri muri Kamonyi, wifashishwa n’abaturage bajya kwivuriza ku bitaro bya Ruhango ubu byahinduwe iby’intara, abandi bakawifashisha mu kugeza umusaruro wabo ku ruganda rw’imyumbati ruri i Kinazi, icyakora abawukoresha bakavuga ko kubera imiterere yawo ituma iterambere ryabo ritagerwaho.

Abaturage bavuga ko byabagoraga cyane nk’iyo hari umubyeyi cyangwa umurwayi urembye agomba kujyanwa ku bitaro bya Kinazi, abandi bakagarazagaza ko byabagoraga kugeza umusaruro wabo ku ruganda, kuko uyu muhanda utameze neza.

Ubwo yifatanyaga n’abahinzi gutangiza igihembwe cy’ihinga, Minisitri w’intebe, yijeje aba baturage ko byamaze kwemezwa ko uyu muhanda uzakorwa mu ngengo y’imari y’uyu mwaka. Gusa abasaba ko igihe uzaba wamaze gukorwa bagomba kuwufata neza.

Abaturage bavuga ko bashimishijwe no kuba uyu muhanda ufite ibirometero bisaga 40 ugiye gukorwa, kuko bizatuma iterambere ryabo ryihuta.

Uwitwa Claude Mucyo utuye mu kagari ka Gisari umurenge wa Kinazi agira ati “biratunejeje cyane, uyu muhanda wacu rwose watugoraga mu kwihutisha iterambere ryacu, ariko ubwo Nyakubahwa Minisitiri w’Intebe ariwe ubyivugiye, turizera ko ugiye gukorwa tukarushaho gutera imbere”.

Habimana Valens uyobora ibitaro bya Kinazi avuga ko nabo uyu muhanda nukorwa, uzafasha kugabanya imbogamizi bahuraga nazo, dore ko akazi kabo kari kariyongeye kuko ibi bitaro byamaze kugirwa iby’intara.

Ngo byabagoraga kujya kuzana abarwayi hirya no hino mu byaro bitandukanye, kubera imiterere mibi y’umuhanda.

Uretse kuba minisitiri w’intebe yemereye abaturage ko uyu muhanda ugiye gukorwa vuba yanabasezeranyije ibikorwa by’amazi meza nayo akunze kuba ikibazo muri aka gace k’amayaga.

Eric Muvara